Rusiya Dağlıq Qarabağ ətrafında sülh və təhlükəsizliyi təmin etməyib və erməni xalqına xəyanət edib, Avropa Şurasının prezidenti Şarl Mişel “Euronews” telekanalına müsahibəsində bildirib.
“Vəziyyət aydındır. Rusiyanın erməni əhalisinə xəyanət etdiyini heç kim görməməyə bilməz. Rusiya öz hərbçilərinin orada olmasını və sabitlik və təhlükəsizlik razılaşmalarına zəmanət verməsini istəyib. Və biz görürük ki, bu hərbi əməliyyat orada heç bir hərbi mövcudluğu olmayan Avropa İttifaqından fərqli olaraq Rusiyanın zərrə qədər reaksiyası olmadan başlayıb.
Şarl Mişel bu həftənin sonunda İspaniyanın Qranada şəhərində keçiriləcək Avropa İttifaqının sammiti zamanı Ermənistan və Azərbaycan arasında vasitəçilik təklif etmək niyyətində olduğunu bildirib.
Avropa İttifaqı Şurasının prezidentinin sözlərinə görə, Azərbaycan bütün Azərbaycan əhalisinin, o cümlədən erməni əhalisinin hüquqlarını və təhlükəsizliyini qorumaq üçün “xoş niyyət nümayiş etdirməli” və beynəlxalq ictimaiyyəti vəziyyətin monitorinqinə cəlb etməlidir.
O, həmçinin Azərbaycanın Dağlıq Qarabağa qarşı hərəkətlərindən dərin məyus olduğunu bildirib və əmin edib ki, bu barədə İlham Əliyevə məlumat verib.
Mişel bildirib ki, Aİ Dağlıq Qarabağdan məcburi köçkünlərə dəstək verməkdə Ermənistanın yanında olacaq.
Eyni zamanda o qeyd edib ki, çətin münasibətlərə baxmayaraq, Azərbaycan Aİ üçün tərəfdaş olaraq qalır.
