Avropa İttifaqında Dağlıq Qarabağ ermənilərinin üzləşdiyi humanitar vəziyyətin həlli üçün səylər göstərilir və onlar hesab edirlər ki, Rusiya humanitar yüklərinin Ağdam-Askeran yolundan keçməsi önəmli addımdır. Bu isə Laçin dəhlizinin yenidən açılmasına töhfə verməlidir. Bunu Avropa İttifaqı Şurasının prezidenti Şarl Mişelin adından yayılan bəyanatda deyilir.
Bəyanatda qeyd olunur ki, Mişel son bir neçə gündə təkcə Ermənistan və Azərbaycan liderləri ilə telefon danışıqları aparmayıb, həm də Türkiyə prezidenti ilə görüşdə mövzunu müzakirə edib.
"Bu kontekstdə biz bu gün Rusiyanın humanitar yardımının Ağdam-Askeran yolu ilə keçməsini qeyd edirik. Yerdə vəziyyət sürətlə pisləşir. Qarabağ ermənilərinin zəruri mallarla təmin edilməsi vacibdir. Bu gün Ağdam-Askeran marşrutunun açılması mühüm addımdır, bu da Laçin dəhlizinin yenidən açılmasına öz töhfəsini verməlidir.
Biz əvvəlki razılaşmalara və Beynəlxalq Ədalət Məhkəməsinin qərarına uyğun olaraq Laçin dəhlizinin blokadasının açılmasına güclü inamımızı bir daha vurğulayırıq.
Yerindəcə ağır vəziyyət çox uzun müddətdir davam edir. İndi payız və qış ayları öncəsi humanitar yardımı təmin etmək üçün davamlı və qarşılıqlı məqbul həllər tapmaq vacibdir”, - Şarl Mişelin ofisi bildirib.
