İyulun 4-də xarici işlər naziri Ararat Mirzoyan Ermənistanda diplomatik fəaliyyətini başa vuran İran İslam Respublikasının səfiri Abbas Bədəxşan Zohurini qəbul edib.
Xarici işlər naziri Mirzoyan səfir Zohurinin səlahiyyət müddətinin Ermənistan üçün çox çətin dövrə təsadüf etdiyini qeyd edərək, onun Ermənistan və İran arasında qarşılıqlı anlaşma və münasibətlərin dərinləşdirilməsi istiqamətində səylərini yüksək qiymətləndirib və ona gələcək diplomatik fəaliyyətində uğurlar arzulayıb.
Həmsöhbətlər Ermənistan-İran əməkdaşlığının müxtəlif gündəm məsələlərini müzakirə edib, iki ölkə arasında siyasi dialoqun yüksək səviyyədə olduğunu qarşılıqlı məmnunluqla qeyd ediblər. İki ölkə arasında əməkdaşlığın regional çağırışlarla üzləşmək imperativindən, eləcə də iki xalq arasında tarixən formalaşmış dostluq əlaqələrindən qaynaqlandığı vurğulanıb.
Xarici siyasət idarələri arasında yüksək səviyyəli qarşılıqlı səfərlərin və vaxtaşırı məsləhətləşmələrin müsbət dinamikasını saxlamaq istəyi bir daha təsdiqlənib. Qarşılıqlı maraq doğuran iqtisadi proqramların həyata keçirilməsi, ikitərəfli ticarətin təşviqi üçün mövcud potensialdan istifadəyə yönəlmiş addımların vacibliyi qeyd edilib.
Görüşdə iki ölkənin Cənubi Qafqazda sülhün və sabitliyin bərqərar olmasına dair baxışlarına və bu istiqamətdə səylərə toxunulub.
