İlham Əliyev Azərbaycan prezidentinin Laçın rayonunda xüsusi nümayəndəsi təyin olunan Məsim Məmmədovu qəbul edib.
Görüşdə Əliyev Dağlıq Qarabağ problemi ilə bağlı əvvəlki danışıqlar prosesinə toxunub, ATƏT-in Minsk qrupunun həmsədrlərinin Laçın rayonuna xüsusi yanaşma nümayiş etdirdiyini vurğulayıb.
“Ermənistan bütövlükdə Laçın rayonunun Azərbaycana qaytarılmasını qəbuledilməz sayıb. Halbuki onlar digər rayonlardan da çıxmaq fikrində deyildilər. İndi - müharibədən iki il yarım keçəndən sonra bu, hər kəsə daha aydın oldu”,- deyə Əliyev qeyd edib və əlavə edib ki, vasitəçilər bu vəziyyəti möhkəmləndirməyə çalışıb.
Azərbaycan prezidenti xüsusilə Fransadan şikayətlənib. Onun sözlərinə görə, son iki il yarım ərzində Azərbaycan əleyhinə aksiyalar həyata keçirilir, Bakıya qarşı ittihamlar səsləndirilir.
“Avropa Parlamentinin Azərbaycana qarşı qəbul etdiyi bir sıra qətnamə ermənipərəst, rüşvətxor və anti-Azərbaycan qruplaşmanın məhsuludur və burada aparıcı rolu Fransa deputatları oynayır”,- deyə Əliyev qeyd edib.
