ՀՀ նախագահ Վահագն Խաչատուրյանը նախագահական նստավայրում հյուրընկալել է վարչապետի պաշտոնակատար Նիկոլ Փաշինյանին։ Հանդիսավոր արարողության շրջանակում նախագահ Խաչատուրյանը ստորագրել է Ազգային ժողովի «Քաղաքացիական պայմանագիր» խմբակցության ներկայացմամբ՝ Նիկոլ Փաշինյանին Հանրապետության վարչապետ նշանակելու մասին հրամանագիր։
Նախագահ Վահագն Խաչատուրյան - Ինձ համար մեծ պատիվ է Հայաստանի Հանրապետության Սահմանադրության 149-րդ հոդվածի այս հնարավորությունը՝ ստորագրել հրամանագիր Ձեզ Հայաստանի Հանրապետության վարչապետի պաշտոնում նշանակելու վերաբերյալ, որի առաջարկությունը ես ստացել եմ Ազգային ժողովում քաղաքական մեծամասնության կողմից։ Անկեղծ շնորհավորում եմ, մաղթում եմ Ձեզ մեծ համբերություն, տոկունություն, վճռականություն՝ այս դժվարին ժամանակներում մեզ առաջնորդելու, երկիրը դեպի ապագա, բարեկեցիկ ապագա տանելու համար:
Վստահ եմ նաև, որ Ձեր սկզբունքայնությունն ի նպաստ է լինելու, իհարկե, Հայաստանի Հանրապետության պետականության ամրապնդմանը՝ սահմանադրականության սկզբունքներից ելնելով, ի բարօրություն Հայաստանի Հանրապետության ժողովրդի խաղաղ և արժանապատիվ ապագայի։
Շնորհավորում եմ, պարոն վարչապետ:
Վարչապետ Նիկոլ Փաշինյան - Շնորհակալ եմ, պարոն նախագահ, շնորհակալ եմ հրավերի և հանդիսավորության պայմաններում հրամանագիրը ստորագրելու համար, նաև Ձեր խոսքերի, վստահության և աջակցության համար: Պիտի անկեղծ ասեմ՝ 2018 թվականին, երբ Ժողովրդական, ոչ բռնի, թավշյա հեղափոխության արդյունքում ստանձնեցի Հայաստանի Հանրապետության վարչապետի պաշտոնը, դժվար կլիներ կանխատեսել, որ մենք անցնելու ենք այսպիսի ճանապարհով, և կարծում եմ, որ դժվար կլիներ կանխատեսել, որ մենք ի վիճակի ենք լինելու այս ճանապարհը հաղթահարել: Բայց մենք գտնվում ենք այնտեղ, որտեղ գտնվում ենք, և կարծում եմ, որ այս ամենում առանցքային դերն ու նշանակությունը միանշանակ և աներկբա Հայաստանի Հանրապետության ժողովրդինն է, որը, ի վերջո, պետական գիտակցության և պետականակենտրոնության առանձնահատուկ արտահայտություններ ի ցույց դրեց այս ողջ ընթացքում: Եվ իհարկե, սա մեծ պարտավորություն և պարտավորվածություն է: Իհարկե, առաջիկայում կձևավորվի Կառավարությունը, և Կառավարության բոլոր անդամները, ներառյալ՝ ես, երդման տեքստով արդեն կամրագրենք մեր պարտավորությունները մեր ժողովրդի առաջ:
Ուզում եմ նաև Ձեզ շնորհակալություն հայտնել այսօր Ազգային ժողովի ամբիոնից ունեցած ուղերձի համար: Շատ կարևոր ուղերձներ հղեցիք, ինչին ուշադիր հետևում էի: Հույս ունեմ, որ 9-րդ գումարման Ազգային ժողովն ի վերջո կդառնա այնպիսի հարթակ, որը քաղաքական գաղափարների, մտքերի, տեսլականների և ոչ թե անձանց բախման միջավայր կլինի: Այսօր էլ տեսա, որ Ազգային ժողովի նախագահի թեկնածուն՝ «Քաղաքացիական պայմանագիր» կուսակցության կողմից առաջադրված, պարոն Ռուբինյանը, այդ նույն ուղերձը հղեց՝ ցուցաբերելով «Քաղաքացիական պայմանագիր» կուսակցության խմբակցության պատրաստակամությունը՝ խորհրդարանում աշխատել առանց անձնական և անձնավորված թիրախավորումների, հայհոյանքի և վիրավորանքի տրամաբանությունից դուրս: Իհարկե, բանավեճերը պետք է և կլինեն սուր, բայց շատ կարևոր է, թե սրությունն ինչի մասին է, սրությունը քաղաքական, տնտեսական, սոցիալ-տնտեսական բովանդակության մասին պետք է լինի և ոչ թե փոխադարձ թիրախավորումների: Համենայն դեպս, մենք Ձեր ուղերձը լսել ենք և այդ ուղերձով ենք առաջնորդվելու, հույս ունեմ՝ կհաջողվի չշեղվել այս ուղղությունից, որովհետև միակողմանի չէ այդ գործընթացը, և եթե ընդդիմությունն այս տրամաբանությունը նույնպես ընդունելի համարի, կարծում եմ՝ շատ ավելի որակյալ աշխատանք կունենանք։
Պարոն նախագահ, ևս մեկ անգամ ուզում եմ շնորհակալություն հայտնել Ձեզ նաև այս ողջ ընթացքում Ձեր ցուցաբերած աջակցության համար։ Իհարկե, մենք մեր հանդիպումները և համատեղ աշխատանքն ամբողջությամբ չենք լուսաբանում, որովհետև աշխատանքային մակարդակում շատ սերտ երկխոսության մեջ ենք և քննարկում ենք բազմաթիվ հարցեր, այս ընթացքում նաև պաշտոնապես և ոչ պաշտոնական շփումներում ես միշտ տեսել, զգացել եմ Ձեր աջակցությունը, ինչի համար շնորհակալ եմ։
Նախագահ Վահագն Խաչատուրյան - Մեծարգո պարոն վարչապետ, շատ կարճ ուղղակի․ ես նորից շնորհակալություն եմ Ձեզ հայտնում այդ վստահության համար, որ կա Կառավարության, նախագահականի, Ազգային ժողովի միջև, որովհետև ինքս մասնակից եմ կարևորագույն պետական որոշումների, որի հնարավորությունը Դուք տվել եք, ըստ էության, Սահմանադրությունում այդ հնարավորությունները շատ պայմանական են։ Եվ այդ վստահությունն է ինձ նաև համոզում, որ իրականում այն քաղաքականությունը, որ վարում եք Դուք՝ որպես Կառավարության ղեկավար, որպես քաղաքական մեծամասնության ուժի ղեկավար, դրանք ի նպաստ են լինելու Հայաստանի Հանրապետության ամրապնդմանը, դրանք ի նպաստ են լինելու Հայաստանի ինքնիշխանության ամրապնդմանը և միանշանակ ի նպաստ են լինելու Հայաստանի ուժեղ ապագային։
Ես նորից Ձեզ հաջողություններ եմ մաղթում, կամք, տոկունություն, ամրություն, որովհետև արտաքինից այն, ինչ որ տեսնում ենք շատերս, այդ թվում՝ Հայաստանի Հանրապետության քաղաքացիները, դա միայն արտաքին մասն է։ Ներքին այն իրավիճակները, որ կան, որոնց մասին շատերը տեղեկացված չեն, դրանք պահանջում են սկզբունքայնություն, որը Դուք ցուցաբերել եք այս տարիների ընթացքում: Դուք ճիշտ նշեցիք․ այն, ինչ 2018-ին էր, մենք չէինք կարող պատկերացնել, թե այսպիսի զարգացումներ են տեղի ունենալու ոչ միայն մեր տարածաշրջանում, այլև ընդհանրապես աշխարհում: Մենք պետք է կարողանանք, ինչպես Դուք եք ասում, միշտ շեշտում եք, որ ամենակարևորը՝ կառավարելի դարձնենք այն պրոցեսները, որոնք տեղի են ունենում:
Եվ մի փոքրիկ դիտարկում ընդհանրապես քաղաքական միջավայրի հետ կապված: Այն, որ մեր՝ Հայաստանի Հանրապետության քաղաքացիներին տրված է հնարավորություն Սահմանադրությամբ ընտրել իշխանություն, սա դարձել է իրականություն: Սա մեզ համար միշտ եղել է երազանք: Մեր ժողովուրդը տարիներ շարունակ իր ընտրությունը կատարել է, բայց, ցավոք սրտի, իշխանությունն իր ձեռքից վերցրել են։ 2018 թվականից հետո մեր ժողովուրդը կատարում է իր ընտրությունը և ստանում է այդ իշխանությունը։ Եվ իշխանությունը, որն ընտրվել է այդ ժողովրդի կողմից, այդ պարտավորությունն ունի և պետք է արդարացնի այդ վստահությունը, որ ստանում է ժողովրդի կողմից։ Բայց կարևոր մի գործոն էլ կա: Պետության կայունությունը, ամրապնդումը, ամրությունը կախված է ոչ միայն քաղաքական մեծամասնությունից, որն ստանձնում է իշխանություն, այլև՝ ընդդիմությունից: Ինչքան որակյալ քաղաքական մեծամասնության կարիք ունի ժողովրդավարական երկրներում հասարակությունը, ավելի կարևոր նշանակություն և դեր ունի ընդդիմությունը: Եվ մենք միասին պետք է ամեն ինչ անենք, այդ թվում՝ ընդդիմության հետ, աշխատենք: Ես լսել եմ նաև պարոն Ռուբինյանի ուղերձները: Ես վստահ եմ, որ Դուք տրամադրված եք այդ իրավիճակը, այդ մթնոլորտը ստեղծել, որովհետև, ի վերջո, բոլորիս նպատակը մեկը պետք է լինի՝ ունենալ ամուր, հզոր Հայաստանի Հանրապետություն։
Շնորհակալ եմ:
