Կառավարության ճեպազրույցի ժամանակ վարչապետ Նիկոլ Փաշինյանն անդրադարձավ ԲՀԿ ղեկավար Գագիկ Ծառուկյանի տանը տեղի ունեցած խուզարկության շրջանակում կենդանիների քնեցմանը, ինչի հետևանքով առյուծներից մեկը չէր արթնացել:
Լրագրողը նշեց՝ հանրությունը պահանջում է, որ քնից չարթնացած կենդանու մասով պատշաճ պատասխանատվություն լինի:
Վարչապետ Նիկոլ Փաշինյանը պատասխանեց. «Կենդանիների հետ կապված՝ եթե կա մարդ, որ պետք է պատասխանատվություն կրի, կկրի: Ինչքան գիտեմ, քննություն է նշանակված»:
Նշենք, որ ըստ Կենդանաբանական այգու հաղորդագրության՝ կենդանու մոտ արձանագրվել են ներքին օրգանների ախտահարումներ՝ փայծաղի, լյարդի, թոքերի և սրտի հետ կապված խնդիրներ, ինչպես նաև լեղապարկի փոփոխություններ, ճարպակալում և որովայնի խոռոչում հեղուկի առկայություն։
Ըստ Վայրի բնության և մշակութային արժեքների պահպանման հիմնադրամի հաղորդագրության՝ անկած առյուծը տարեց էր և լեուցիստ (գենետիկական առանձնահատկություն, որն արտահայտվում է բաց գունավորմամբ և հաճախ զուգորդվում է բնածին թաքնված հիվանդություններով): Նաև նշվել էր, որ խոշոր կատվազգիների դեպքում ցանկացած միջամտություն արվում է քնեցման եղանակով, և եթե նույնիսկ տեղափոխումը կազմակերպվեր և իրականացվեր ոչ արտակարգ իրավիճակում, միևնույն է, ռիսկերն անխուսափելի էին:
ՀՀ քննչական կոմիտեից էլ հայտնել էին, որ Էգ առյուծի՝ քնեցումից չարթնանալու հանգամանքները կդարձվեն քննության առարկա:
