Ղրիմում Հյուսիսային Ղրիմի ջրանցքի վրայով անցնող երկաթուղային կամուրջը լիովին ավերվել է, կամուրջը «այլևս գոյություն չունի» հայտարարել է Ուկրաինայի զինված ուժերը:
«Դա օկուպանտների ռազմավարական ռազմա-լոգիստիկ զարկերակն էր։ Այն տրանսպորտային միջանցքի մի մասն էր՝ բեռները, ռեսուրսներն ու ռազմանյութական միջոցները երկու առանցքային ուղղություններով տեղափոխելու համար: Մեկը Ռուսաստանի տարածքից Ղրիմով՝ ապահովում էր հարավային ուղղությամբ զորքերի խմբավորմանը, մյուսը՝ թերակղզու ներսում, աջակցում էր Ղրիմի ռազմական ենթակառուցվածքների գործունեությանը», - ասվում է հայտարարությունում:
Ուկրաինական զինվորականների տվյալներով՝ օբյեկտի վրա անօդաչու թռչող սարքերի հարվածները տեղի են ունեցել երկու փուլով։ Հունիսի 22-ի գիշերը դրոնները հարվածել են երկաթուղային գծերին՝ փլուզելով կամրջի հատվածներից մեկը։ Հաջորդ գիշերն անօդաչու թռչող սարքերը հարձակվել են կառույցի վերանորոգման սարքավորումների վրա՝ լրացուցիչ վնաս պատճառել կառույցի մնացած մասին։
