ԱՄՆ վարչակազմը քննարկում է Հորմուզի նեղուցով նավթային լցանավերի տեղաշարժը վերսկսելու միջոցները, այդ թվում՝ վճարովի անցում մտցնելու հնարավորությունը, ամերիկյան նավերի հսկողությամբ անցնող նավերի համար: Այս մասին հայտնում է Politico թերթը՝ հղում անելով իր աղբյուրներին։
Ըստ թերթի՝ Սպիտակ տունը ուսումնասիրում է այնպիսի տարբերակներ, որոնք կարող են համոզել նավատերերին և ապահովագրական ընկերություններին նորից օգտագործել Հորմուզի նեղուցը՝ ԱՄՆ-ի և Իրանի միջև ընթացող բանակցությունների ֆոնին: Քննարկվող առաջարկներից մեկը նավերին «VIP անցաթուղթ» տրամադրելն է՝ նեղուցով արագացված անցում լրացուցիչ վճարի դիմաց, հնարավոր է՝ ԱՄՆ ռազմածովային ուժերի նավերի ուղեկցությամբ: Ինչպես նշում է Politico-ն, դեռևս վերջնական որոշում չի կայացվել:
Kpler վերլուծական ընկերության տվյալներով՝ Պարսից ծոցում Հորմուզի նեղուցի մուտքի մոտ դեռևս 500 նավ է կանգնած, այդ թվում՝ 220 նավթային լցանավ, որոնք սպասում են անվտանգ անցման:
Ավելի վաղ ԱՄՆ նախագահ Դոնալդ Թրամփը հայտարարել էր, որ Հորմուզի նեղուցը վերաբացվել է նավագնացության համար, սակայն շատ նավատերեր զգուշություն են պահպանում՝ վախենալով տարածաշրջանում իրավիճակի հետագա սրացումից: Մինչև ճգնաժամը սկսվելը նեղուցով անցնում էր նավթի համաշխարհային մատակարարումների մոտ 20%-ը:
