Կիևի՝ Եվրամիությանն անդամակցությունը արագացնելու պահանջին ի պատասխան` Գերմանիայի կանցլեր Ֆրիդրիխ Մերցն առաջարկել է Ուկրաինային տրամադրել ԵՄ «ասոցացված անդամի» հատուկ կարգավիճակ։ Այս մասին նա նամակ է հղել ԵՄ խորհրդի նախագահ Անտոնիու Կոստային, Եվրահանձնաժողովի նախագահ Ուրսուլա ֆոն դեր Լայենին և Կիպրոսի նախագահ Նիկոս Քրիստոդուլիդեսին, որը նախագահում է ԵՄ խորհրդում, հաղորդում է Reuters-ը։
Մերցի ծրագրի համաձայն՝ Ուկրաինան սկզբում չի ստանա ԵՄ անդամի բոլոր իրավունքները, այդ թվում՝ քվեարկության իրավունքը։ Կիևը կկարողանա մասնակցել Եվրոպական խորհրդի և ԵՄ խորհրդի նիստերին, բայց առանց քվեարկության իրավունքի։ Բացի դրանից՝ նախատեսվում է Եվրոպական հանձնաժողովի ասոցացված անդամի դերը՝ առանց պորտֆելի և առանց քվեարկության իրավունքի, Եվրոպական խորհրդարանի ասոցացված պատգամավորներ՝ առանց քվեարկության իրավունքի, և Եվրոպական դատարանի ասոցացված դատավոր՝ «զեկուցողի օգնականի» տեսքով։
Ուկրաինան սկզբում ոչ մուծումներ կկատարի ԵՄ բյուջե, ոչ էլ դրանից ուղղակիորեն միջոցներ կստանա, սակայն անմիջական կառավարման ներքո գտնվող ծրագրերը կարող են աստիճանաբար հասանելի լինել՝ վերապահումներով։ Առաջարկվում է ԵՄ օրենսդրությունը նույնպես ընդունել փուլ առ փուլ։
Ֆրիդրիխ Մերցը կարծում է, որ ԵՄ-ին Ուկրաինայի լիարժեք անդամակցությունը մոտ ապագայում անիրատեսական է։ Նա նշել է, որ անդամակցության գործընթացի կարճաժամկետ ավարտն անհնար է «անթիվ խոչընդոտների» և վավերացման քաղաքականապես բարդ ընթացակարգերի պատճառով։ Նա ընդգծել է, որ առաջարկվող կարգավիճակը «անդամակցության թեթև ձևաչափ չէ», այլ քայլ, որը զգալիորեն գերազանցում է գործող Ասոցացման համաձայնագիրը և կարագացնի բանակցային գործընթացը։
Առաջարկի մեջ առանձնահատուկ տեղ է գրավում անվտանգության ոլորտը։ Գերմանիայի կանցլերն առաջարկում է, որ Ուկրաինան իր արտաքին և պաշտպանական քաղաքականությունը լիովին համապատասխանեցնի Եվրամիության քաղաքականությանը։ Անդամ պետությունները պետք է քաղաքական պարտավորություն ստանձնեն Ուկրաինայի նկատմամբ կիրառելու փոխօգնության դրույթը՝ համաձայն ԵՄ-ի մասին պայմանագրի 7-րդ կետի 42-րդ հոդվածի, որպեսզի ստեղծեն «անվտանգության էական երաշխիք» և հեշտացնեն խաղաղ բանակցությունները, որոնք նախաձեռնել է ԱՄՆ նախագահ Դոնալդ Թրամփը:
Նախատեսվում է նաև պահեստային մեխանիզմ կամ վերապահում «կարգավիճակի կորստի» հարցով այն դեպքում, եթե Ուկրաինան խախտի ԵՄ հիմնական արժեքները կամ լուրջ շեղում գրանցի անդամակցության բանակցություններում։
