«Իրազեկ քաղաքացիների միավորում» ՀԿ հիմնադիր Դանիել Իոաննիսյանն օրերս տեղեկացրել էր, որ «Անկախ դիտորդ» դաշինքը ենթադրյալ խախտումներ է հայտնաբերել «Իմ քայլը» հիմնադրամի՝ վերջին ամիսների գործունեության մեջ, ուստի դիմել են վարչական դատարան՝ վարչական պատասխանատվության ենթարկելու հիմնադրամի գործադիր մարմնի ղեկավար Աննա Հակոբյանին:
Աննա Հակոբյանը հրատապ ասուլիս է հրավիրել, որի ընթացքում հայտարարել է, որ փաստաբանական թիմը հաղորդում կներկայացնի Դանիել Իոաննիսյանի և «Անկախ դիտորդ» դաշինքի դեմ:
««Իմ քայլը» ասոցացվում է «Քաղաքացիական պայմանագրի» հետ, փաստ է Աննա Հակոբյանի ասոցացումը,- ասում են նրանք, և ինչպես նշված է «Ազատության» հոդվածում, եթե վարչական դատարանում ապացուցվեն «Իմ քայլը» հիմնադրամի խախտումները, ինձ սպառնում է տուգանք մինչև 6 մլն դրամի չափով:
Այժմ հայտարարում եմ, որ սույնով խախտվել են իմ՝ Սահմանադրությամբ, մի շարք օրենքներով և միջազգային կոնվենցիաներով պաշտպանվող իրավունքները: Մասնավորապես՝ Սահմանադրության 7-րդ հոդվածի՝ ընտրական իրավունքի սկզբունքները, սահմանում են՝ ԱԺ-ի և համայնքների ավագանիների ընտրությունները, ինչպես նաև հանրաքվեներն անցկացվում են ընդհանուր հավասար, ազատ և ուղղակի ընտրական իրավունքի հիման վրա՝ գաղտնի քվեարկությամբ. մասնավորապես իմ հանդեպ խախտվել է Սահմանադրության այս հոդվածը:
ՀՀ ընտրական օրենսգրքի 4-րդ հոդվածը՝ ազատ ընտրական իրավունքը, սահմանում է, որ ընտրություններն անցկացվում են ընտրական իրավունքի իրականացման, ազատության և կամավորության սկզբունքների հիման վրա: Ոչ ոք իրավունք չունի պարտադրել ընտրողին՝ քվեարկելու որևէ թեկնածուի, կուսակցության, կուսակցությունների դաշինքի օգտին կամ դեմ, ինչպես նաև հարկադրել ընտրողին՝ մասնակցելու կամ չմասնակցելու ընտրություններին:
Խախտվել են Մարդու իրավունքների և հիմնարար ազատությունների պաշտպանության մասին միջազգային կոնվենցիայի կարգավորումները: Կոնվենցիայի 3-րդ հոդվածը սահմանում է, որ ոչ ոք չի կարող ենթարկվել խոշտանգումների կամ անմարդկային կամ նվաստացուցիչ վերաբերմունքի կամ պատժի, ինչը, ըստ ՄԻԵԴ-ի ձևավորած դատական պրակտիկայի, ներառում է նաև հոգեբանական ճնշման, ահաբեկման և նվաստացման ձևերը: Իսկ կոնվենցիայի 10-րդ հոդվածով ամրագրված՝ արտահայտվելու ազատության իրավունքը ենթադրում է, որ անձը չպետք է ենթարկվի ճնշման կամ ազդեցության, որը կարող է սահմանափակել նրա՝ ազատ կամարտահայությունը, այդ թվում՝ ընտրական գործընթացների համատեքստում:
Խախտվել են Կանանց նկատմամբ խտրականության բոլոր ձևերի վերացման մասին ՄԱԿ-ի կոնվենցիայի համապատասխան դրույթները, որոնք քրեականացնում են ցանկացած հիմքով բռնությունը, ներառյալ՝ հոգեբանական և հուզական բռնության ձևերը, որոնք կարող են արտահայտվել սպառնալիքի, հարկադրանքի կամ մանիպուլյացիայի միջոցով, և դիտարկվում են որպես կանանց նկատմամբ խտրականության դրսևորում:
Խախտվել է Քրեական օրենսգրքի 210-րդ հոդվածը, որը սահմանում է՝ անձի ընտրական կամ հանրաքվեին մասնակցելու իրավունքի ազատ իրականացումը խոչընդոտելն առաջացնում է քրեական պատասխանատվություն»,- ասաց նա:
Հաշվի առնելով վերոնշյալը՝ Աննա Հակոբյանն իր փաստաբանական թիմին խնդրել է ուսումնասիրություն կատարել՝ նախաձեռնելու երկու գործողություններ, այն է՝ Դանիել Իոաննիսյանի նկատմամբ քրեական գործ հարուցելու նպատակով հաղորդման ներկայացման հնարավորություն, նաև՝ «Անկախ դիտորդ» դաշինքի դեմ հայցադիմումի ներկայացման հնարավորություն՝ «Իմ քայլը» հիմնադրամի գործարար համբավին, հեղինակությանը հասցրած վնասները հատուցելու պահանջով:
«Հիմա հայտարարում եմ, որ մտադիր եմ և վճռական եմ իմ իրավունքները պաշտպանելու, իմ՝ որպես կին, իմ՝ որպես քաղաքացի, իմ՝ որպես ընտրող, իմ՝ որպես հիմնադրամի գործադիր տնօրեն»,- հայտարարեց Աննա Հակոբյանը:
