Պենտագոնը մշակում է Հորմուզի նեղուցում իրանական ռազմական թիրախներին հարվածելու ծրագրեր, եթե հրադադարը խզվի, հաղորդում է CNN-ը՝ հղում անելով տեղեկացված աղբյուրներին։
Նրանց խոսքով՝ քննարկվող տարբերակները ներառում են հարվածներ իրանական թիրախներին Հորմուզի նեղուցում, Պարսից և Օմանի ծոցերում, ներառյալ հարձակումները փոքր մոտորանավակների, ականակիր նավերի և այլ միջոցների վրա:
Աղբյուրների համաձայն՝ ԱՄՆ զինված ուժերը կարող են նաև իրականացնել նախագահ Դոնալդ Թրամփի սպառնալիքը՝ հարվածել ենթակառուցվածքային ու էներգետիկ օբյեկտներին՝ Իրանին ստիպելու նստել բանակցությունների սեղանի շուրջ։
ԱՄՆ-ն, հավանաբար, լրացուցիչ հարվածներ կուղղի նաև Իրանի մնացած ռազմական ակտիվներին, այդ թվում՝ հրթիռային կայանքներին ու արտադրական հզորությանը։
CNN-ը նախկինում հաղորդել էր, որ ԱՄՆ հետախուզության տվյալներով՝ Իրանի հրթիռային կայանքների մոտ կեսը և հազարավոր հարձակողական անօդաչու թռչող սարքեր պահպանվել են ԱՄՆ ռմբակոծություններից հետո։
Ռազմական հարձակումների մեկ այլ տարբերակ է Իրանի առանձին ռազմական առաջնորդների թիրախավորումը, ներառյալ Իսլամական հեղափոխության պահապանների կորպուսի գլխավոր հրամանատար Ահմադ Վահիդին, որոնք ակտիվ խաթարում են բանակցությունները, նշել է մի աղբյուր։
Միաժամանակ ԱՄՆ նախագահը բացառել է միջուկային զենքի կիրառումը Իրանի դեմ հակամարտության ժամանակ:
«Ոչ, ես չեմ պատրաստվում դա անել։ Ոչ մի երկիր չպետք է միջուկային զենք օգտագործի»,- Թրամփն ասել է լրագրողներին։
Նա նաև նշել է, որ չի շտապում համաձայնություն կնքել Իրանի հետ հակամարտությունը դադարեցնելու համար: Նախագահի կարծիքով ժամանակն ամերիկյան կողմում է, ոչ թե՝ իրանական:
