Ընդհանրապես, ոստիկանությունը մեր երկրում կայացման և զարգացման տարբեր փուլեր է անցել, և պետք է ասել, որ ընդհանուր առմամբ (և ես դա արձանագրել եմ դեռ ընդդիմադիր գործունեություն ծավալելու ընթացքում), և ես ընդունել եմ միշտ էլ, որ ոստիկանությունը պետության ողնաշարն է, և այդ ողնաշարը միշտ պետք է ամուր լինի, և դա բոլոր քաղաքացիների շահերից է բխում։ Այդ մասին Ներքին գործերի նախարարությունում Ոստիկանության 108-րդ տարեդարձի առիթով կոլեգիայի հանդիսավոր նիստի ժամանակ ասաց վարչապետ Նիկոլ Փաշինյանը։
«Մենք ընդհանրապես ոստիկանության գործունեությունը գնահատելիս պետք է հիշենք այն ժամանակները, երբ Հայաստանը նոր-նոր անկախացել էր, Խորհրդային ոստիկանությունը, ըստ էության, արդեն անհասկանալի վիճակում էր, պարզ չէ՝ կար, չկար, քայքայված էր, քայքայված չէր... Պետք է հիշենք՝ այդ ժամանակները ինչ էր տեղի ունենում Հայաստանում. բացարձակ ամենաթողության մի վիճակ, մինչև այն պահը, երբ որ շատ մեծ քաղաքական ուշադրություն կդարձվեր ոստիկանության համակարգի կայացմանը, և դա մի շատ կարևոր շրջադարձային կետ էր մեր երկրում ընդհանրապես իրավակարգի և կարգուկանոնի պահպանման և ամրապնդման համար: Եվ, իհարկե, ոստիկանությունը ամեն փուլում զարգացման մի աստիճանի հասել է, բայց ամեն ժամանակ ունի իր առանձնահատկությունները և իր պահանջները: Էն ինչ որ մենք լավ ենք անում այսօր, բավարար չի կարող դիտվել վաղը չէ մյուս օրը, որովհետև փոխվում են ժամանակները, և փոխվում են մարտահրավերները։ Պարզ է, որ ինֆորմացիոն դարում շատ լուրեր մեծ անհանգստություններ են առաջացնում նաև հանցագործությունների հետ կապված։ Հիմա մարզերում էլ որ հանդիպումներ ենք ունենում, մարդիկ այդ մասին շատ խոսում են։ Բայց ինձ համար՝ որպես նախկինում լրագրությամբ զբաղված, այսինքն՝ ինֆորմացիոն հոսքերի մեջ գտնված մարդու, պարզ է, որ խնդիրը հետևյալի մեջ է. այսօր ցանկացած բան, որ տեղի է ունենում, մարդու առաջին ռեակցիան այն չէ, որ վերցնեմ ոստիկանություն կամ շտապօգնություն զանգեմ, ասում են՝ մի հատ նկարենք գցենք կա՛մ Ինստագրամ, կա՛մ Ֆեյսբուք, հետո նոր մնացած գործողությունները կանենք»,- նշեց վարչապետը։
«Այսօր նաև շատ է ինֆորմացիան ամեն անկանոնության մասին: Մեկը մեքենան սենց չքշեց, նենց քշեց, և այլն և այդպես շարունակ: Եվ դա երբեմն ստեղծում է տպավորություններ, որոնք ընդհանուր պատկերը չեն արտահայտում, այսինքն՝ ընդհանուր պատկերը վիճակագրության մեջ է արտահայտվում, և նաև կարևոր է միջազգային գնահատականը; Եկեք չմոռանանք, որ մեզանում եղել են չեմ կարող, ցավոք, բացառել, որ մինչև հիմա էլ կան, հանցագործության կամ ինչ-որ դեպքեր չգրանցելու, ինչ-որ դեպքեր մի կողմ գցելու և այլն. այս վատ սովորություններից մենք պետք է հետևողականորեն ազատվենք։
Եթե մենք չփոխվենք, մենք չենք կարող փոխել այն իրականությունը, որը ուզում ենք դեպի լավը փոխվի: Եթե մենք չենք փոխվում, կարող ենք արձանագրել, որ իրականությունը փոխվում է դեպի վատը, որովհետև իրականությունը առաջնորդության կարիք ունի, և ոստիկանությունը, ըստ էության, զինվորական տրամաբանությամբ ծառայություն է, ոստիկանությունն առաջնորդող դերակատարում պետք է ունենա իր պատասխանատվության ոլորտում։ Ես երբեմն զգում եմ, որ մենք, ասելով ոստիկանություն, բաց ենք թողնում անհատական առաջնորդության և անհատական պատասխանատվության էլեմենտը, որովհետև ոստիկանությունն ուղղակի վիճակագիր չպետք է լինի։ Ոստիկանության յուրաքանչյուր ծառայող իր պատասխանատվության գոտին ունի. իր լիազորությունների շրջանակն ունի, և եթե յուրաքանչյուր ոստիկան անհատական պատասխանատվություն չի զգում տեղի ունեցողի հետ կապված, ինքն ընդամենը վիճակագիր է. էսքան գողություն եղավ, էսքան թմրամիջոցի դեպք եղավ, էսքան զենք եղավ, էսքան վթար եղավ... Մենք ընդամենը արձանագրողի դերում կլինենք։ Սա շատ կարևոր է, որ մենք կարողանանք համակարգը զարգացնել այնպես, որ յուրաքանչյուր ոք, ով աշխատում է իքս տարածքում, զգա՝ իր պատասխանատվության առաջնորդն է։
Հաջորդ խնդիրն էլ կա, որ մենք գիտակցում ենք՝ ոստիկանության աշխատանքը պետք է լինի սոցիալական առումով երաշխիքներ ապահովող, որովհետև ոստիկանության աշխատանքը շատ բարդ աշխատանք է, կապված է և՛ ոստիկանության աշխատողի. և՛ ուրիշների կյանքի, և՛ անվտանգության հետ,: Մենք այս բոլոր գործոնները պետք է հաշվի առնենք, և մենք գնում ենք այս ուղղությամբ և այս տրամաբանությամբ։ Ես կարծում եմ, որ մենք ունենք ոստիկանության գործունեության այնպիսի ավանդույթներ, որ այդ ավանդույթների վրա հիմնվելով՝ մենք կարող ենք այս փոփոխությունը անընդհատ ապահովել և ՀՀ ոստիկանության ինքնությունը ամրացնել, վերափոխել և անընդհատ համապատասխանեցնել ժամանակակից պահանջներին: Իմ կարծիքով՝ մենք ընթանում ենք այս ուղղությամբ, բայց նաև այսօր՝ 21-րդ դարում, ռեպուտացիայից ավելի կարևոր բան չկա, և մեդիատիրույթում երբեմն երկրորդական է դառնում իրականությունը, ավելի կարևոր է դառնում, թե ինչպես է մատուցվում իրականությունը: Այս առումով ոստիկանությունը ՆԳՆ առաջնորդությամբ մեդիաառաջնորդություն պետք է ստանձնի, որպեսզի այդ հաղորդակցությունը հնարավոր լինի պատշաճ մակարդակով ապահովել։
Հոյակապ է, շատ լավ է, որ ՀՀ-ում ոստիկանության գործունեության նկատմամբ 61 տոկոս վստահություն կա, իսկապես, դա շատ լավ է, և իսկապես, դա շատ բարձր գնահատական է: Բայց ո՞վ է ասել, որ մենք գոհ ենք, որ 61 տոկոս է, իսկ ինչո՞ւ 85 տոկոս չէ։ Ոստիկանությունը պետք է 21-րդ դարում լինի դինամիկ և ճկուն։ Ոչ դինամիկ և ոչ ճկուն ոչ մի համակարգ չունի շանս, պետք է լինել դինամիկ և ճկուն, և ես կարծում եմ, որ մենք այսօր այդ պոտենցիալը ստեղծել ենք, համակարգերը ստեղծել ենք, մենք ակտիվ դինամիկ փոխվում ենք։ Մենք ՀՀ-ում հանցավորության իրավիճակը պետք է ոչ միայն դարձնենք այնպիսին, ինչպիսին մենք ուզում ենք, այլև քաղաքացիների զգացողությունը պետք է դարձնենք այդպիսին։
Իդեալում ոստիկանության բոլոր ծառայողները առաջնորդություն պետք է ստանձնեն, որովհետև եթե ոստիկանը շարքային է, դա չի նշանակում, որ ինքը առաջնորդ չէ, որովհետև ոստիկանի համազգեստ կրելն առաջնորդության նշան է իր պատասխանատվության գոտում, իր չափով։ Ես տեսնում եմ, որ մեր ոստիկանությունը զարգացել է և հասել է այս կետին, որ կարող ենք այսպիսի բաների մասին խոսել։
Կրկին շնորհավորելով բոլորիս Ոստիկանության օրվա առիթով՝ ուզում եմ նաև ևս մեկ անգամ շնորհակալություն հայտնել Հայաստանի Հանրապետությանը ձեր մատուցած ծառայությունների համար, որովհետև ոստիկանությունը ՀՀ-ում ներքին անվտանգության առանցքային դերակատարն է, և Հայաստանի Հանրապետությունում ներքին անվտանգության հետ կապված խնդիրներ կան, բայց միանշանակ և աներկբա է, որ առանձին դրվագներ հանած՝ ներքին անվտանգության ճգնաժամեր մենք չենք ունեցել, և սա շատ կարևոր արձանագրում է։
Ես հավատում եմ ձեզ, հավատում եմ ձեր նվիրվածությանը, հավատում եմ ձեր պրոֆեսիոնալիզմին, հավատում եմ ձեր ներուժին, որ դուք կկարողանաք խնդիրներ լուծել և կկարողանաք այնպես անել, որ ոչ միայն ոստիկանությունն ընդհանուր առմամբ, այլև ամեն ոստիկան ամեն հաջորդ օրվա հետ լինի ավելի պրոֆեսիոնալ, ավելի պատասխանատու, ավելի արդյունավետ, քան երեկ էր։ Եվ մենք պետք է չվախենանք սովորելուց»,- ասաց Նիկոլ Փաշինյանը։
