Խորհրդարանը քննարկում է Կառավարության ներկայացրած՝ «Առողջության համընդհանուր ապահովագրության մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու մասին» հարցը:
Հիմնական զեկուցող, ՀՀ առողջապահության նախարարի տեղակալ Լենա Նանուշյանը հիշեցրեց՝ արդեն 3 ամիս է, ինչ ունենք նոր համակարգ՝ Առողջության համընդհանուր ապահովագրության համակարգը, և կարող ենք ասել՝ «3 ամսական նորածին ունենք»:
Նրա խոսքով՝ ցանկացած բարեփոխում, ինչքան էլ կատարյալ մշակված ու սահմանված լինի, միևնույն է, ներդրման ժամանակ պետք է հետևել, իմպլեմենտացիան իրականացնելիս վերհանել խնդիրները շահառուների, ինչպես նաև բուժաշխատողների հետ:
Նանուշյանը տեղեկացրեց՝ այս ամիսներին ստացել են մի շարք առաջարկություններ տարբեր շահառուների և խմբերի կողմից և մշակել են այս նախագիծը:
««Առողջության համընդհանուր ապահովագրության մասին» օրենքում առաջարկում ենք մի շարք փոփոխություններ իրականացնել, առաջին հերթին՝ ավելացնել մի շարք խմբեր ընդհանուր խմբերի ցանկում: Առաջինը էլեկտրոնային հարթակով իրականացնող ուղևորափոխադրման ծառայության փոխադրողներին, վարորդներին, սկսած մյուս տարվա հունվարի 1-ից թույլ տալ, որպեսզի իրենք էլ կարողանան մասնակից լինել այս համակարգին»,- պարզաբանեց նա:
Լենա Նանուշյանը տեղեկացրեց՝ ընդլայնում են նաև ՀՀ պաշտպանության ժամանակ զինծառայողների կյանքին կամ առողջությանը պատճառած վնասների հատուցման մասին օրենքի իմաստով շահառու ճանաչված մարդկանց շրջանակը:
Հաջորդ փոփոխությունը, որն առաջարկվում է, ապահովագրված անձանց փոխկապակցված անձանց մասով է:
«Ինչպես գիտեք, օրենքը հաստատվելուց փոխկապակցված անձինք արդեն կարող էին ապահովագրվել՝ սկսած 2028 թվականից, բայց քանի որ տարբեր շահառուներից, որոնք արդեն իսկ հանդիսանում են ապահովագրության շահառու և, գոհ լինելով տրամադրված համակարգի ծառայություններից, իրենք են առաջարկել, որպեսզի փոխկապակցված անձինք, այսինքն՝ իրենց ընտանիքի անդամները, որոնք ներգրավված չեն ապահովագրության համակարգում, կարողանան նույնպես վճարել և մասնակցել ապահովագրության այդ համակարգի շրջանակում տրամադրվող ծառայություններին»,- նշեց առողջապահության նախարարի տեղակալը:
Հաջորդ փոփոխությունը ապահովագրավճար վճարող անհատ ձեռնարկատերերի ապահովագրավճարների կատարման պատշաճ ապահովման նպատակով առաջարկվում է նրանց համար գործող վերջնաժամկետը այս տարվա ապրիլի 20-ի փոխարեն սահմանել հուլիսի 20-ը:
Մյուս փոփոխությունը, որ առաջարկվում է այս փաթեթում, վերաբերում է Բնակչության բժշկական օգնության և սպասարկման օրենքին:
