Կառավարության՝ մարտի 26-ի նիստին Քաղաքաշինության կոմիտեի նախագահ Եղիազար Վարդանյանը հիշեցրեց, որ ԼՂ-ից տեղահանված հայրենակիցները վարչապետի հետ հանդիման ժամանակ հարց էին բարձրաձայնել՝ կարո՞ղ են մինչև 400 քառակուսի մետր մակերեսով հողակտոր ձեռք բերել և վրան անհատական բնակելի տուն կառուցել:
«Ուզում եմ տեղեկացնել, որ, այո՛, այդ սահմանափակումը հանված է, և նրանք կարող են մինչև 400 քառակուսի մետր համապատասխան նշանակության հող ձեռք բերել և իրենց անհատական բնակելի տունը կառուցել:
Բացի դրանից՝ առիթից օգտվելով, ուզում եմ ասել, որ ՀՀ-ում կա շուրջ 40 հազար չկառուցապատված հողակտոր, որոնք փոքր են 400 քառակուսի մետրից: Նաև այդ կարգավորումն ենք փոխել, և այդ հնարավորությունն ենք ընձեռել, որպեսզի այն քաղաքացիները, որոնք կուզեն կա՛մ ձեռք բերել, կա՛մ ունենալ այդ հողակտորը, արդեն կարգավորումները թույլ տան այնտեղ բնակելի տուն կառուցելու»,- ասաց Եղիազար Վարդանյանը:
Վարչապետ Նիկոլ Փաշինյանը պարզաբանեց՝ նախկինում կար կարգավորում, որ նույնիսկ նպատակային նշանակության կառուցապատման հողերի վրա շինարարություն չէր կարելի անել, եթե հողակտորը 400 քառակուսի մետրից փոքր է:
Այս համատեքստում Եղիազար Վարդանյանը պարզաբանեց. «Հիմա քառակուսի մետր մակերեսի սահմանափակումը հանել ենք: Միայն պայմաններ ենք դրել, որ այդ հողակտորները պետք է ունենան մուտքի և ելքի պատշաճ ճանապարհ, և հակահրդեհային նորմերը սահմանված կարգով ապահովված լինեն, և այդ հողակտորների վրա կարող է կառուցապատման տոկոսը լինել մինչև 40 տոկոս, բայց հողակտորի մակերեսի սահմանափակումը հանել ենք»:
Փաշինյանը հավելեց. «Պատկերավոր ասած՝ 100 մետրի վրա 40 մետրը կարելի է տրամադրել կառուցապատմանը: Այսինքն՝ մենք փոխել ենք հիմա դա, և 400 մետրից ներքև էլ կարելի է կառուցապատում անել»:
Փաշինյանը կարծիք հայտնեց, թե կարգավորումը լավն է, և որ դա նշանակում է, որ «կուլտուրա» է փոխվում, իսկ դրան նպաստում է 16 միլիոն դրամով բնակարանային ծրագիրը:
«Առանձնատների չափերի փոփոխություն է տեղի ունենում, ու սա նորմալ է, որովհետև մարդիկ սկսում են ռացիոնալ հաշվարկել: Բա կոմունալ ծախս կա, պահպանման ծախս կա»,- ասաց նա:
Փաշինյանը նաև նշեց, որ պաշտոնավարման ընթացքում ճամփորդությունների ժամանակ մի հետևություն է արել, ըստ որի՝ այնտեղ, որտեղ պետությունները և հասարակություններն ուժեղ են, զարգացած են, այդտեղ առանձնատների չափերը փոքր են:
