Վարչապետ Նիկոլ Փաշինյանը մասնակցել է «Ներառական զարգացում. ձեռքբերումներ և անելիքներ» խորագրով համաժողովին, որը նվիրված էր Ղարաբաղից տեղահանված մեր հայրենակիցների հիմնախնդիրներին և դրանց լուծման քայլերին։
Վարչապետը հանդես է եկել ելույթով, ողջունել ներկաներին և նշել, որ այս ընթացքում տաբեր ձևաչափերով անընդհատ կապի մեջ են եղել Ղարաբաղից տեղահանված մեր հայրենակիցների հետ։ «Կառավարության օրակարգում, 2023 թվականից ի վեր, այս թեման եղել է առաջնահերթությունների շարքում։ Մենք նաև հրապարակային երկխոսության միջոցով փորձել ենք մեր քաղաքականությունների շրջանակներն ընդգծել Ղարաբաղից տեղահանված մեր հայրենակիցների համար՝ մեր ռազմավարական պատկերացումներն ավելի ընկալելի դարձնելու, և ինչպես ես ձևակերպում եմ՝ Հայաստանում տնավորվելու թեմայի վրա առավել մեծ կենտրոնացվածություն ցուցաբերելու նպատակով»,- ասել է Նիկոլ Փաշինյանը։
.jpg)
Վարչապետը կարևորել է նման ձևաչափով քննարկումները՝ կայացված որոշումների վերաբերյալ հնչեցված արձագանքները և առաջարկներն ավելի համակարգված ձևով լսելու և հստակ պատասխանելու առումով։ «Ես շատ կարևոր եմ համարում, որ մենք օգնենք Ղարաբաղից տեղահանված մեր քույրերին և եղբայրներին, որ հոգեբանական այդ փնտրտուքի վիճակից դուրս գան։ Կարծում եմ՝ պետք է կենտրոնանանք նրա վրա, որ օգնենք, ամեն ինչով աջակցենք, որ նախ՝ ստանան Հայաստանի Հանրապետության քաղաքացիություն, երկրորդ՝ տնավորվեն Հայաստանի Հանրապետությունում և իրենց ու իրենց ընտանիքների ճակատագիրը հարատև կապեն Հայաստանի Հանրապետության հետ։ Սա շատ կարևոր է և՛ քաղաքական, և՛ հոգեբանական առումով»,- ասել է երկրի ղեկավարը։
Նիկոլ Փաշինյանը տեղեկացրել է, որ 2023 թվականից ի վեր Հայաստանի Հանրապետության պետական բյուջեից տարբեր ծրագրերով շուրջ 145 միլիարդ դրամ է հատկացվել Ղարաբաղից տեղահանված մեր հայրենակիցների կարիքները հոգալու համար։ Վարչապետն ընդգծել է՝ ճիշտ կլինի, որ համաժողովի երկրորդ կեսը և եզրափակիչ մասը նվիրված լինի անելիքներին, ապագային։ Ըստ Նիկոլ Փաշինյանի՝ Կառավարությունը հասել է մի հանգրվանի, որ պետք է ամփոփի այդ ուղղությամբ կատարած աշխատանքների նախորդ փուլի արդյունքները և արձանագրի առաջիկա անելիքները։ Երկրի ղեկավարի կարծիքով՝ համաժողովի ձևաչափը դա թույլ է տալիս։ «Մենք այստեղ հավաքվել ենք հարցերը հնչեցնելու և պատասխաններ տալու համար։ Մեր խնդիրը շատ գործնական է՝ մենք ուզում ենք, որ դուք օր առաջ տնավորվեք Հայաստանի Հանրապետությունում՝ քաղաքացիություն, տուն, աշխատանք, սոցիալական միջավայր։ Մեզ պետք է ձեզնից ազդակներ ստանալ, թե էլ ինչ պետք է անենք, որպեսզի այդ հարցը հնարավորինս արդյունավետ լուծենք»,- ամփոփել է Նիկոլ Փաշինյանը և արդյունավետ աշխատանք մաղթել ներկաներին։
.jpg)
Հաջորդիվ անցկացվել է պանելային քննարկում՝ «Ղարաբաղից տեղահանված հայերի սոցիալ-տնտեսական ներառման գործընթացը» թեմայով, որին մասնակցել են շահագրգիռ գերատեսչությունների ղեկավարները և պատասխանել հարցերին, որոնք հիմնականում վերաբերել են բնակարանային ապահովմանը, կրթական, առողջապահական, սոցիալական, զբաղվածության ծրագրերին, քաղաքացիության ստացման կարգին։
Ամփոփելով քննարկումը՝ վարչապետը շնորհակալություն է հայտնել քննարկման համար, ընդգծել՝ այն ցույց տվեց, որ բազմաթիվ հարցեր արդեն լուծված են, սակայն կան հարցեր՝ քաղաքացիության և բնակարանային ապահովման, որոնց ուղղությամբ դեռ աշխատանք պետք է տարվի, որոշակի լարավարկումներ իրականացվի, որպեսզի որոշումները պատշաճ իրավական հիմք ունենան: «Ընդհանուր առմամբ, թեման կամ վերնագիրը, որի ներքո մենք աշխատում ենք, հոգատարությունն է՝ հոգատարությունը Ղարաբաղից տեղահանված մեր քույրերի և եղբայրների նկատմամբ, բայց նաև այդ հոգատարությունն ունի կոմպոնենտներ՝ մյուս պաշտոնյաների նկատմամբ էլ, ովքեր այդ որոշումները կայացնում են, պետք է հոգատարություն ցուցաբերենք: Այս հոգատարության կարևոր կոմպոնենտ է որոշումների հավասարակշռվածությունը»,-ասել է Նիկոլ Փաշինյանը և հավելել, որ անհրաժեշտ է այնպիսի հավասարակշռված որոշումներ կայացնել, որպեսզի այդ որոշումների շուրջ նեգատիվ չձևավորվի ո՛չ Ղարաբաղի մեր հայրենակիցների, ո՛չ նախկինում արդեն Հայաստանի քաղաքացիություն ունեցող և Հայաստանում ապրող հայրենակիցների շրջանում։
.jpg)
Այս համատեքստում վարչապետը նաև ընդգծել է. «Այսինքն՝ այս նրբությունները շատ կարևոր են, ընդհանրապես բոլոր որոշումների մեջ հավասարակշռությունը պահելը շատ կարևոր է։ Կարևոր է նաև, որ մեր որոշումները, խոսույթները, մեր կողմից իրականացվող արտաքին և տարածաշրջանային քաղաքականություններին չհակասեն։ Տեսեք, մենք այսօր Ադրբեջանի հետ հաստատել ենք խաղաղության և չենք կարող կայացնել որոշումներ, որոնք այդ հաստատված խաղաղությունը կխարխլեն, կփլուզեն, մեզ կվերադարձնեն կոնֆլիկտի տրամաբանության մեջ»։
Նիկոլ Փաշինյանը նաև արձանագրել է. «Մենք դեգերումներին պետք է վերջ տանք, պանդխտությանը պետք է վերջ տանք: Մենք ունենք դուք, դուք ունեք պետություն, և այդ պետությունը Հայաստանի Հանրապետությունն է։ Մենք այսօր ուզում ենք, մեր ամբողջ ռազմավարությունը հիմնվում է դրա վրա, որ դուք տնավորվեք, բառիս և՛ ֆիզիկական, և՛ հոգեբանական իմաստով, Հայաստանի Հանրապետությունում։ Եվ մենք իրար հետ մեր այս պետությունը, որը մեծ բարեբախտություն է մեզ համար, հայ ժողովրդի համար, դարձնենք ավելի բարեկեցիկ, ավելի ապահով, ավելի անվտանգ և ի վերջո՝ կարողանանք գոյատևման տրամաբանությունից դուրս գալ զարգացման և բարեկեցության տրամաբանություն, խաղաղության տրամաբանություն: Ես կարծում եմ, որ մենք պետք է կենտրոնանանք հենց այդ խնդիրների լուծման վրա»։
Երկրի ղեկավարը ևս մեկ անգամ շնորհակալություն է հայտնել քննարկման համար, նշել, որ առաջիկայում բարձրացված հարցերի ուղղությամբ աշխատանքներ կիրականացվեն, և լուծման մեխանիզմներ կմշակվեն:
