Ներկայումս Մերձավոր Արևելքում կա 201 ուկրաինացի ռազմական փորձագետ, և ևս 34-ը «պատրաստ են տեղափոխվելու», հայտարարել է Ուկրաինայի նախագահ Վոլոդիմիր Զելենսկին Մեծ Բրիտանիայի խորհրդարանում ունեցած իր ելույթի ժամանակ։
Զելենսկու խոսքով՝ ռազմական մասնագետները գիտեն, թե ինչպես պաշտպանվել «Շահեդ» տիպի անօդաչու թռչող սարքերից, որոնցով Ռուսաստանը պարբերաբար գրոհում է Ուկրաինան:
«Մեր թիմերն արդեն ժամանել են ԱՄԷ, Կատար և Սաուդյան Արաբիա, այժմ ուղևորվում են Քուվեյթ։ Մենք աշխատում ենք նաև այլ երկրների հետ, արդեն կնքվել են համաձայնագրեր։ Մենք չենք ցանկանում, որ հարևանների դեմ իրանական ահաբեկչությունը շարունակվի»,- ասել է Զելենսկին։
Ուկրաինայի նախագահը հավելել է, որ փորձագետներ ուղարկելու որոշումը կայացրել է՝ ի պատասխան Ուկրաինայի գործընկերների, այդ թվում՝ ԱՄՆ-ի խնդրանքի:
Միևնույն ժամանակ, Զելենսկին կոչ է արել դաշնակիցներին չմոռանալ Ուկրաինայի մասին՝ Մերձավոր Արևելքում պատերազմի ֆոնին, և զգուշացրել է Ռուսաստան-Իրան համագործակցությունից բխող սպառնալիքի մասին։
Իր հերթին, Մեծ Բրիտանիայի վարչապետ Քիր Սթարմերը խոստացել է թույլ չտալ, որ Իրանում պատերազմը շեղի ուշադրությունն Ուկրաինայի պատերազմից։
