Պետական եկամուտների կոմիտեի նախագահ Էդուարդ Հակոբյանը, լրագրողների հետ զրույցում անդրադառնալով Իրանի շուրջ ստեղծված իրավիճակին և դրա ազդեցությանը հայ-իրանական սահմանի վրա, նշել է, որ իրավիճակը վերահսկելի է։
«Իրականում սահմանը՝ Ագարակի անցման կետի մասին ենք խոսում, այդտեղ այս պահին այդպես էական խնդիրներ չունենք։ Հետևյալն է տեղի ունենում. մենք օրական հետևում ենք դինամիկային՝ և՛ մարդկանց շարժի, և՛ բեռների շարժի։ Գրեթե նույն մակարդակներում են, ինչ նախկինում եղել են»։
Անդրադառնալով հնարավոր դժվարություններին՝ Հակոբյանը պարզաբանել է, որ խնդիրները հիմնականում կապված են հարևան երկրի տարածքում լոգիստիկայի հետ.
«Պարզապես երբեմն լինում են հերթեր, օրինակ՝ հերթեր են գոյանում, և նաև տնտեսվարողներից լսում ենք, որ կան լոգիստիկ խնդիրներ Իրանում։ Այսինքն՝ խնդիրները ավելի շատ այնտեղ են»։
ՊԵԿ նախագահի խոսքով՝ Հայաստանի կողմից մաքսային գործընթացները շարունակվում են առանց խափանումների. «Անկախ դրանից՝ մեր սահմանահատումների վիճակագրության տեսանկյունից եթե մոտենանք իրավիճակին, այդտեղ մեծ ռիսկեր դեռ չեն առաջացել։ Սահմանը և սահմանային անցման կետը՝ մաքսային գոտին, աշխատում է բնականոն ռեժիմով՝ առանց որևէ էական խնդրի»,- ասել է Էդուարդ Հակոբյանը։
