ԱՄՆ ավարտվել է «Օսկար»-ի 98-րդ մրցանակաբաշխությունը: Միջոցառման «Տարվա լավագույն ֆիլմ» գլխավոր մրցանակը ստացել է ռեժիսոր Փոլ Թոմաս Անդերսոնի «Պայքար պայքարից հետո» (One Battle After Another) հեղափոխականների մասին պատմող ֆիլմը:
Անդերսոնն արժանացել է «Լավագույն ռեժիսոր» անվանակարգի մրցանակին։ Ընդհանուր առմամբ ֆիլմը ստացել է վեց մրցանակ, այդ թվում՝ «Լավագույն քասթինգ», «Լավագույն ադապտացված սցենար», «Լավագույն մոնտաժ»։
16 անվանակարգում ներկայացված «Մեղսագործները» (Sinners) ֆիլմը, որի պրոդյուսերներից է ամերիկահայ Սև Օհանյանը, հաղթել է 4 անվանակարգում, այդ թվում՝ «Լավագույն կինեմատոգրաֆ», «Լավագույն օրիգինալ սցենար», «Լավագույն օրիգինալ երաժշտություն»։
«Լավագույն դերասան» անվանակարգում մրցանակը ստացել է Մայքլ Բ․ Ջորդանը «Մեղսագործները» (Sinners») ֆիլմում իր դերակատարման համար։ «Լավագույն դերասանուհի» է ճանաչվել Ջեսի Բաքլին Շեքսպիրի ընտանեկան ողբերգության մասին պատմող «Համնետ» (Hamnet) դրամայում մարմնավորած կերպարի համար:
«Լավագույն անիմացիոն ֆիլմ» մրցանակը ստացել է KPop Demon Hunters («K-pop դևերի որսորդներ») ֆիլմը, «Լավագույն միջազգային ֆիլմը»՝ նորվեգական «Սենտիմենտալ արժեք» (Sentimental Value) կինոնկարը, իսկ «Լավագույն վավերագրական ֆիլմ» մրցանակը ստացել է Mr. Nobody Against Putin («Պարոն Ոչ ոքն ընդդեմ Պուտինի») ֆիլմը։
