Ընդհանուր ապահովագրական փաթեթի՝ տարվա առավելագույն շեմ չկա, այսինքն՝ 1 անձի վրա տարվա մեջ ինչքան գումար պետք է ծախսվի, այդպիսի առավելագույն շեմ չկա: Այդ մասին Ազգային ժողովում առողջության համընդհանուր ապահովագրության համակարգի գործարկման ընթացքի վերաբերյալ աշխատանքային քննարկման ժամանակ հայտարարեց առողջապահության նախարար Անահիտ Ավանեսյանը:
Ըստ նախարարի՝ չկա նաև ընդհանուր քանակային ապահովագրության շրջանակներում ծառայություններ ստանալու շեմ, բայց կա ամեն կոնկրետ ծառայության համար նախատեսված շեմ:
«Օրինակ բերեմ` արտահիվանդանոցային կարգով ՄՌՏ հետազոտության տարվա երկու դեպք ենք փոխհատուցում: Դրանից ավելին արդեն ապահովագրական փաթեթից դուրս է»,- ասաց նա:
Սահմանափակում կա նաև, օրինակ, նեղ մասնագետի խորհրդատվության մասով, նախատեսվում է երկու խորհրդատվության փոխհատուցում:
«Ամեն ծառայության որոշակի շեմեր կան, և ունենք առավել փոխհատուցման գներ, և դրանից ավելի արդեն չենք փոխհատուցում կոնկրետ ծառայության արժեքը»,- ասաց նա:
