Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն հայտարարել է, որ իր երկիրը կդիմի ԵՄ դատարան RePowerEU ծրագիրը չեղարկելու համար, որը ենթադրում է ՌԴ-ից ԵՄ գազի ներկրման արգելք:
Երկուշաբթի ԵՄ Խորհուրդը համաձայնեցրել է Եվրամիության երկրներ ռուսական գազի ներկրումն արգելող կանոնները։
«Այսօր ԵՄ անդամ 27 պետությունները պաշտոնապես հավանություն են տվել ԵՄ ինչպես ռուսական խողովակաշարային գազի, այնպես էլ հեղուկացված բնական գազի ներկրումն արգելող կանոններին: Հեղուկացված բնական գազի ներկրման լիակատար արգելքը ուժի մեջ կմտնի 2027 թվականի սկզբին, իսկ խողովակաշարային գազինը՝ 2027 թվականի աշնանից»,- ասվում է ԵՄ մամուլի ծառայության հայտարարության մեջ։
ԵՄ հայտարարության համաձայն, Եվրահանձնաժողովը «նախատեսում է օրինագիծ առաջարկել մինչև 2027 թվականի վերջը ռուսական նավթի ներմուծումից հրաժարվելու վերաբերյալ»:
Բրյուսելում բացատրել են, որ ընդունված կանոնակարգն առանցքային փուլ է REPowerEU ծրագրի նպատակին հասնելու համար՝ դադարեցնել ԵՄ-ի կախվածությունը ռուսական էներգակիրներից։
