Խորհրդարանում առաջին ընթերցմամբ քննարկվել է «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագիծը:
Նախագծով առաջարկվում է կարգավորել ԵԱՏՄ անդամ պետությունների հարկ վճարողների կողմից շահագործվող էլեկտրոնային առևտրի հարթակների միջոցով ֆիզիկական անձանց ապրանքների վաճառքների մասով ԱԱՀ-ի հաշվարկման և վճարման կարգավորումները, ԱԱՀ-ի հաշվարկման և վաճառքների ու վերադարձի մասով տեղեկատվության ներկայացումը, ինչպես նաև հարթակների միջոցով ՀՀ-ում հաշվառված հարկ վճարողների կողմից ֆիզիկական անձանց վաճառքների փաստաթղթավորմանը և հաշվետվողականությանը վերաբերող հարցերը: Այս մասին, ինչպես տեղեկանում ենք ԱԺ պաշտոնական կայքից, ասել է ՀՀ պետական եկամուտների կոմիտեի նախագահի տեղակալ Համլետ Սահակյանը:
Մանրամասն ներկայացնելով առաջարկվող կարգավորումները՝ Համլետ Սահակյանը տեղեկացրել է, որ ՀՀ տնտեսվարող սուբյեկտների կողմից ԵԱՏՄ առևտրի էլեկտրոնային հարթակներով ԵԱՏՄ անդամ այլ պետությունում գտնվող ֆիզիկական անձանց ապրանքների մատակարարման գործարքները համարվելու են ԱԱՀ-ի 0 տոկոս դրույքաչափով հարկվող գործարքներ:
Ընդ որում, ԱԱՀ-ի 0 տոկոս դրույքաչափի կիրառությունը հիմնավորվելու է առևտրի էլեկտրոնային հարթակը շահագործողի կողմից հարկային մարմին ներկայացված տեղեկատվությամբ:
Նախատեսվում է նաև պարզեցնել ՀՀ տնտեսվարողների էլեկտրոնային հարթակներով այլ երկրներից ՀՀ վաճառքների գործընթացը: Նախագծով նաև սահմանվում է, որ առևտրի էլեկտրոնային հարթակները շահագործողները չեն կարող գործել հարկման հատուկ համակարգերում:
