Ինչո՞ւ է հեղուկ գազի գինը թանկացել: Սա սովորական պրոցես է, որն ամեն տարվա դեկտեմբերին տեղի է ունենում, և որևէ արտառոց բան չկա: Այդ մասին Կառավարության՝ հունվարի 15-ի նիստին ասաց Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանը՝ անդրադառնալով քննարկումներին, թե հեղուկ գազի գինը թանկացել է բենզինի գնի էժանացման շրջանակում, որպեսզի բենզինի վաճառք ապահովեն:
«Ամեն տարի, երբ Լարսը ճանապարհային հանգույցի խնդիր է ունենում, տրանսպորտային հանգույցները թանկանում են, և ամեն տարի նոր պատճառաբանություններ են լինում: Սովորական պրոցես է, ապրիլ-մայիս ամիսներին էժան է, դեկտեմբերին թանկ է, և այստեղ լուրջ պրոբլեմ գոյություն չունի, դեֆիցիտ ևս գոյություն չունի»,- պարզաբանեց Գեղամ Գևորգյանը:
Վարչապետ Նիկոլ Փաշինյանն արձագանքեց՝ դա խնդիր է, և պետք է լուծվի խաղաղության համատեքստում, որպեսզի ՀՀ-ն մատակարարումների տարբեր ուղիներ և աղբյուրներ ունենա. «Այստեղ է հարցը, պետք չէ շատ բան փնտրել: Եվ մենք պետք է գնանք այդ ճանապարհով և գնում ենք այդ ճանապահով: Համոզված եղեք, որ այս տարի դեկտեմբերին էլ չի լինի այդ հարցը, վստա՛հ եղեք»:
Էկոնոմիկայի նախարար Գևորգ Պապոյանը ևս պարզաբանեց, թե ինչ է տեղի ունենում: Ըստ այդմ՝ սովորաբար ՀՀ հեղուկ գազ գալիս է երկու հիմնական ուղղությամբ՝ Վերին Լարսով՝ ՌԴ-ից, և Իրանից, սակայն հայտնի հանգամանքներով պայմանավորված՝ երկու ուղղություներով էլ բարդություններ կան. «Մի դեպքում ձյան առատ տեղումներ են, մյուս դեպքում՝ գիտենք: Այս պայմաններով պայմանավորված՝ բոլոր գործարարներին մեր առաջարկը հետևյալն է եղել, որ ժամանակն է օգտվել երկաթուղային հաղորդակցությունից: Կարծում ենք՝ առաջիկայում այդ հարցը մեկընդմիշտ կկարողանանք լուծել, որովհետև երկաթուղային հաղորդակցությունն այդպիսի խնդիրների առաջ չի կանգնում, ինչպես, օրինակ, Վերին Լարսը»:
Փոխվարչապետ Մհեր Գրիգորյանը վստահեցրեց, որ շատ հավանական է՝ ապրանքատեսակի շարժը տեղի ունենա նաև երկաթգծով՝ գնորդից մինչև վաճառող, «քաղաքակիրթ ճանապարհով»:
«Կարծում եմ՝ մոտ ժամանակներում շուկան կադապտացվի այսօրվա իրականությանը, և ներմուծումները կիրականացվեն շատ ավելի սիստեմատիկ ու ճիշտ տրանսպորտային ուղիով»,- ասաց նա:
Ամփոփելով թեման՝ Փաշինյանը կրկին հայտարարեց՝ 2026 թվականի դեկտեմբերին այդ երևույթը չի լինելու:
