Կառավարությունը հաստատեց 2026-2030 թվականների իմունականխարգելման ազգային ծրագիրը և կանխարգելիչ պատվաստումների վկայական ստանալու կարգը:
«Այս որոշմամբ մենք հաստատում ենք հանրային առողջապահական ամենակարևոր երաշխիքներից մեկը հանդիսացող պատվաստումների ազգային օրացույցը, նաև պատվաստումների վերաբերյալ միջազգային վկայականների տրամադրման ձևաչափը և այն թիրախները, որոնք մենք մեզ համար դնում ենք՝ պահպանելու 0-1 տարեկան երեխաների պատվաստման ցուցանիշները, և իհարկե, վարակիչ վտանգավոր հիվանդությունների զրոյական դեպքերը: Այդ մասին Կառավարության նիստին ասաց առողջապահության նախարար Անահիտ Ավանեսյանը:
«Պետք է ասեմ, որ մենք վերջին տարիներին ներդրել ենք նոր պատվաստանյութեր: Ներդրել ենք մեր ազգային օրացույցում վերջին սերնդի ավելի համակցված վեցավալենտ պատվաստանյութեր, որոնք զերծ են պահում մի քանի անգամ պատվաստվելու խնդրից: Պետք է նշեմ ջրծաղիկի պատվաստանյութը, որն այլևս մեր օրացույցի մաս է կազմում, և պիտի մի հանգամանք էլ նշեմ, որ վարակիչ հիվանդությունների կանխարգելման առումով պատվաստումների և նաև հանրության մոտ տեղեկատվական դաշտի վրա աշխատանքը իր պտուղները տալիս է, և մենք 2025 թվականին 0-1 տարեկան երեխաների պատվաստումների ցուցանիշում գրանցել ենք 2011 թվականից, ինչքան որ տեղեկատվական վիճակագրական տվյալները մեզ հասանելի են, 95.1 տոկոս, որն ամենաբարձր ցուցանիշն է: Պիտի ասեմ, որ այստեղ նաև որոշակի առումով աշխատանքի ձևաչափի փոփոխությունն է իր պտուղները տալիս: Մենք, հասկանալով տեղեկատվական ապակողմնորոշման հանգամանքը, շատ մեծ ուշադրություն ենք դարձնում ծնողների, մեր մասնագետների հետ աշխատանքին և հասկանում ենք, որ տեղեկատվական դիմակայանությունը բարձրացնելու առումով սա շատ կարևոր է:
Պիտի ասեմ, որ ջրծաղիկի պատվաստումների առումով մեր նպատակն է, որ մեր երեխաները արդեն կայուն իմունիտետով նաև զորակոչվելուց հիվանդացություն առաջացնող և աշխատանքների շատ մեծ խոչընդոտ հանդիսացող ջրծաղիկ հիվանդությունը Հայաստանում այլևս չունենանք. ո՛չ բռնկումներ, ո՛չ դեպքեր:
Մենք նաև Հայաստանում առկայությունն ենք ապահովում այլ երկրներ մեր քաղաքացիների ճամփորդության համար անհրաժեշտ պատվաստանյութերի պաշարների, դրանք հասանելի են, տրամադրում ենք նաև միջազգային ձևաչափի սերտիֆիկատներ:
Նշեմ, որ մեր իմունականխարգելման գործընթացները նաև թվայնացման մեր առաջին թիրախն էին, և այս առումով մենք, սկսած պլանավորումից, պահեստավորումից, արդեն պատվաստումների իրականացման գործընթացից անցել ենք, և ամբողջական թվայնացման այս շրջափուլն ավարտել ենք:
Թիրախային 3 պատվաստումներ ունենք, որոնք 0-1 տարեկան երեխաների համար չեն. դա ՄՊՎ պատվաստանյութն է, որը մենք իրականացնում ենք 13-16 տարեկան դեռահասներին՝ և՛ աղջիկներին, և՛ տղաներին, որը կանխարգելում է քաղցկեղը, և պիտի ասեմ, որ սրա մասով էլ 2025 թվականին գրանցել ենք 48 տոկոս ընդգրկվածություն՝ համեմատած 2021 թվականի 10.8 տոկոսի:
Հաջորդը գրիպի դեմ պատվաստանյութերի ցուցանիշներն են: Մենք այս տարի պատվաստումները շատ ավելի վաղ ենք սկսել. Հայաստանում սեպտեմբերին արդեն առկա էր գրիպի դեմ պատվաստանյութը, և մոտ 200 հազար դեղաչափից արդեն 95 տոկոսի չափով մենք իրականացրել ենք պատվաստումները: Արդյոք հենց նաև այս հանգամա՞նքն է, որ մեզ օգնում է սեզոնային գրիպի կանխարգելման առումով բռնկումների չգնալ շատ մեծ ընդլայնված շրջանակների: Իհարկե, սա էլ իր դերը խաղում է: Նորից նշեմ, որ ջրծաղիկի պատվաստումներն իրականացնում ենք նաև նախազորակոչային և զորակոչային տարիքի մեր քաղաքացիների համար»,- նշեց նախարարը:
Նախարարի խոսքով՝ մեծահասակների շրջանում պարտադիր պատվաստում չկա: «Չափահասների շրջանում սեզոնային գրիպն է: Լինում է կարմրուկի դեմ 10 տարին մեկ անգամ պատվաստման սահմանված պահանջ, քովիդն էլ պարտադիր չէ, բայց մենք ապահովում ենք պատվաստանյութ»,- ասաց Անահիտ Ավանեսյանը:
«Մենք Հայաստանում կիրառում ենք ԱՀԿ նախաորակավորում ստացած լավագույն պատվաստանյութերը»,- ընդգծեց նախարարը:
