Աշխատանքի ընդունվելիս պետք է աշխատողը ստորագրի պայմանագիրը և պետք է այն ստորագրի էլեկտրոնային եղանակով: Այս կարգավորումը 2026 թվականից պարտադիր կդառնա բոլորի համար:
Ըստ այդմ՝ նրանք, ովքեր եկամուտների հայտարարագրում են արել և ունեն էլեկտրոնային ստորագրություն, աշխատանքային հարաբերությունների դաշտում նորից պետք է պայմանագիրը ստորագրեն: Այդ մասին ասուլիսի ժամանակ ասաց ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը:
Էլեկտրոնային ստորագրությունն ունենալը կարևոր է այն քաղաքացիների համար, որոնք նոր են ընդունվելու աշխատանքի, և այն քաղաքացների համար, որոնք արդեն ընդունված են աշխատանքի:
«Ովքեր արդեն ընդունված են աշխատանքի, ընդամենն այս տարվա ընթացքում պետք է ինչ-որ մի օր գործատուի կողմից մոտքագրելուց հետո ստորագրեն իրենց պայմանագրերը: Իսկ նրանք, ովքեր ընդունվելու են աշխատանքի, բնականաբար, պետք է զրոյից ստեղծվի նրանց համար պայմանագիր, որ դառնան աշխատող: Այսինքն՝ պետք է ստորագրեն այն օրը, որից հետո՝ հաջորդ օրը, պետք է գալ աշխատանքի, որովհետև համակարգը կառուցված է այնպես, որ եթե աշխատողը պետք է ներկայանա աշխատանքի, առնվազն դրանից 1 օր առաջ պետք է պայմանագիրը ստորագրվի:
Նրանք, ովքեր արդեն իսկ ունեն էլեկտրոնային ստորագրություն, նրանց համար դա ավելի հեշտ կլինի, իսկ նրանք, ովքեր չունեն, մտածում են, որ ակտիվ են աշխատաշուկայում, բայց վաղը, օրինակ, պետք է աշխատեն, թող օր առաջ դիմեն էլեկտրոնային ստորագրություն ձեռք բերելու համար, որովհետև երբ արդեն գա պահը, որ իրենք ուզում են աշխատեն, միգուցե ստորագրություն չունենալը խոչընդոտի պայմանագիր կնքելը:
Դրա համար շատ լավ կլինի, որ նրանք, ովքեր չունեն, ակտիվ զբաղվեն այդ հարցով, քանի որ դա միակ տարբերակն է աշխատող դառնալու համար»,- ասաց նա:
Հիշեցնենք, որ կարգավորման համաձայն՝ 2025 թվականի ընթացքում աշխատանքի ընդունումը կամ ազատումը կամավորության սկզբունքով էր, իսկ 2026 թվականի հունվարից բոլոր դեպքերում գործատուների և աշխատողների համար պարտադիր կկիրառվեն էլեկտրոնային աշխատանքային պայմանագրերը։ Այսինքն՝ աշխատանքային պայմանագրերի կնքումը, դադարումը և փոփոխումն այսուհետ կիրականացվեն բացառապես թվային հարթակով:
