Ադրբեջանը Վրաստանի հատուկ բարեկամն է, և երկու կառավարությունները բացառիկ բարեկամական հարաբերություններ ունեն։ Այս մասին հայտարարել է Վրաստանի վարչապետ Իրակլի Կոբախիձեն՝ Վրաստանի Առաջին ալիքի հետ հարցազրույցում։
Նա վստահեցրել է, որ երկու երկրի կառավարությունների համար դժվար չի լինի ընդհանուր լեզու գտնել ցանկացած հարցի շուրջ:
Կոբախիձեի խոսքով՝ Թբիլիսիի ու Բաքվի բանակցությունների թեման Ադրբեջանից Վրաստանի տարածքով տարանցման վերջնական համաձայնեցումն է:
«Մեզ համար կարևոր են ադրբեջանական և հայկական կողմերի շահերը։ Մենք ունենք նաև մեր շահերը, և ես կարծում եմ, որ ելնելով բանակցությունների արդյունքներից, հեշտությամբ կգտնենք լավագույն լուծումը, որը կծառայի բոլոր երեք երկրի շահերին»,- ասել է Կոբախիձեն։
Վրաստանի վարչապետն անդրադարձել է նաև Հարավային գազային միջանցքի համաձայնագրի ժամկետի ավարտին՝ նշելով, որ բոլոր հարցերի շուրջ բանակցությունները շարունակվում են։ «Վրացական կողմը հույս ունի ստորագրել մի փաստաթուղթ, որը շահավետ կլինի երկու կողմերի համար»,- ընդգծել է Կոբախիձեն։
