Ռուս-ուկրաինական կարգավորման ամերիկյան ծրագրի շուրջ աղմուկի ֆոնին Վոլոդիմիր Զելենսկին դիմել է ուկրաինացիներին:
Նա հայտարարել է, որ երկիրը կարող է կանգնել դժվարին ընտրության առաջ՝ կորցնել կա՛մ արժանապատվությունը, կա՛մ կարևոր գործընկերոջը. կա՛մ 28 բարդ կետ, կա՛մ չափազանց դժվար ձմեռ:
Զելենսկին նշել է, որ կանի հնարավորը՝ ուկրաինացիների արժանապատվությունն ու ազատությունը պաշտպանելու համար:
«Հաջորդ շաբաթը շատ բարդ և իրադարձություններով լի կլինի։ Այս ընթացքում մեծ ճնշումների ենք բախվելու՝ քաղաքական, տեղեկատվական և այլ։ Բայց մենք կհաջողենք»,- ասել է Ուկրաինայի նախագահը:
Օրերս Վաշինգտոնը ներկայացրել է Ուկրաինայում խաղաղության նախագիծ, որը, ըստ ամերիկյան ԶԼՄ-ների, մշակվել է Մոսկվայի հետ:
28 կետից բաղկացած ծրագրով Ուկրաինան պետք է հրաժարվի իր արևելյան շրջաններից՝ Վաշինգտոնի անվտանգության երաշխիքների դիմաց, կրճատի զինված ուժերի թիվը, հրաժարվի ՆԱՏՕ-ին անդամակցելու գաղափարից առնվազն մի քանի տարով։
Զելենսկին նշել է, որ պատրաստ է փաստաթղթի շուրջ աշխատել գործընկերների հետ: Ակնկալվում է, որ առաջիկա օրերին Ուկրաինայի նախագահը և Դոնալդ Թրամփը կքննարկեն խաղաղության նախագիծը:
Զելենսկին արդեն հեռախոսազրույց է ունեցել Մեծ Բրիտանիայի, Ֆրանսիայի, Գերմանիայի և Իտալիայի ղեկավարների հետ, կրկնել, որ հույս ունի այսուհետ էլ ստանալ Եվրոպայի աջակցությունը:
Ուկրաինայի նախագահը զրուցել է նաև Եվրամիության և ՆԱՏՕ-ի ղեկավարության հետ:
ԱՄՆ փոխնախագահ ՋԵյ Դի Վենսի հետ հեռախոսային բանակցություններից հետո էլ Զելենսկին հայտարարել է, որ համաձայնել է «խորհրդատվական մակարդակով աշխատել Ամերիկայի և Եվրոպայի հետ»՝ հստակեցնելու ամերիկյան ծրագրի մանրամասները։
