Ուկրաինայի զինված ուժերի գլխավոր շտաբը հերքել է Ռուսաստանի զինված ուժերի գլխավոր շտաբի պետ Վալերի Գերասիմովի հայտարարությունը, թե ռուսական զորքերը վերահսկողություն են հաստատել Ուկրաինայի Խարկովի մարզի Կուպյանսկ քաղաքի նկատմամբ: «Կուպյանսկը գտնվում է Ուկրաինայի պաշտպանության ուժերի վերահսկողության տակ: Քաղաքում և նրա շրջակայքում շարունակվում են հատուկ գործողությունները՝ քաղաք ներթափանցած թշնամու դիվերսիոն և հետախուզական խմբերի որոնման ու ոչնչացման համար»,- ասվում է Ուկրաինայի զինված ուժերի գլխավոր շտաբի Facebook-ում հրապարակված հայտարարության մեջ:
«Այն պնդումը, որ Խարկովի մարզի Վոլչանսկ քաղաքի 80%-ը և Պոկրովսկ քաղաքի 70%-ը գրավվել են, իրականությանը չի համապատասխանում»,- հավելել է Ուկրաինայի գլխավոր շտաբը:
ՌԴ ԶՈՒ գլխավոր շտաբի պետ Գերասիմովը ռուսական զորքերի կողմից Կուպյանսկը գրավելու մասին Ռուսաստանի նախագահ Վլադիմիր Պուտինին հայտնել էր նախագահի՝ «Արևմուտք» խմբավորման հրամանատարական կետ այցելության ժամանակ։ Նա վստահեցրել է, որ ռուսական բանակը վերահսկում է Խարկովի մարզի Վոլչանսկի ավելի քան 80%-ը և Դոնեցկի մարզի Պոկրովսկի 70%-ը։ Պուտինը, իր հերթին, հայտարարել է, որ Կուպյանսկի տարածքում շրջափակված է Ուկրաինայի զինված ուժերի 15 գումարտակ։ Նա նաև հայտարարել է, որ արդեն մարտեր են ընթանում Դոնեցկի մարզի Կոստանտինովկա քաղաքում։
