ԱՄՆ նախագահը չի բացառել մեքսիկական թմրակարտելների դեմ ռազմական գործողությունների հավանականությունը: Դոնալդ Թրամփն ընդգծել է ԱՄՆ թմրանյութերի հոսքերը դադարեցնելու կարևորությունը:
«Բայց նախ հարկավոր է դիմել Կոնգրեսին, հարկավոր է, որ և՛ դեմոկրատները, և՛ հանրապետականները համաձայնեն, սակայն դեմոկրատները մի փոքր խելագար են և կարող են դեմ արտահայտվել»,- պնդել է Սպիտակ տան ղեկավարը։
Ավելի վաղ պետքարտուղար Մարկո Ռուբիոն հայտարարել էր, որ Վաշինգտոնը սերտորեն գործակցում է Մեքսիկայի հետ՝ թմրանյութերի ապօրինի շրջանառության դեմ պայքարի շրջանակում:
Լրագրողների հետ զրույցում Դոնալդ Թրամփը ցանկություն է հայտնել ոչնչացնել նաև, իր ձևակերպմամբ, Կոլումբիայում գործող կոկաինի գործարանները։ «Կոչնչացնեի՞ արդյոք դրանք. այո՛: Չեմ ասում, որ կանեմ, բայց հպարտ կլինեի դա անել»,- հավելել է ԱՄՆ նախագահը։
Թրամփը չի բացառում Վենեսուելայի դեմ գործողություններ անցկացնելու հնարավորությունը։ «Նրանք հարյուր հազարավոր մարդկանց բանտերից ուղարկել են մեր երկիր: Այնտեղից թմրանյութերի ահռելի հոսքեր կան»,- մտահոգություն է հայտնել ԱՄՆ նախագահը, միևնույն ժամանակ պատրաստակամություն հայտնել բանակցելու Վենեսուելայի առաջնորդ Նիկոլաս Մադուրոյի հետ։ Վերջինս ևս հայտարարել է, որ բաց է Թրամփի հետ երկխոսության համար:
