Հայաստանը չորրորդ ոսկե մեդալն է նվաճում Ալբանիայի Դուրրես քաղաքում ընթացող Եվրոպայի երիտասարդների և մինչև 23 տարեկանների առաջնություններում:
Ծանրամարտի ֆեդերացիայից տեղեկացնում են, որ երիտասարդների 86 կգ քաշային ծանրորդների պայքարում Հայաստանի ընտրանու անդամ Էմմա Պողոսյանը պոկում վարժությունում ունեցել է երեք հաջող մոտեցում` հաջորդաբար բարձրացնելով 100 կգ, 103 կգ, 105 կգ: Այս վարժությունում Պողոսյանը երրորդն էր: Հրում վարժությունում մեր ծանրորդը բարձրացրել է 131 կգ ու 136 կգ` սահմանելով Եվրոպայի ռեկորդ: Այս ձևում նա առաջինն էր:
Երկամարտի 241 կգ արդյունքով` Էմմա Պողոսյանը դարձավ Եվրոպայի երիտասարդների առաջնության չեմպիոն:
Ավելի վաղ
տեղեկացրել էինք, որ Հայաստանի ծանրամարտի կանանց հավաքականի անդամ, 69 կգ քաշային Մերի Միսակյանը երկամարտի 210 կգ արդյունքով (92+118) բրոնզե մեդալ էր նվաճել Ալբանիայում անցկացվող ծանրամարտի Եվրոպայի երիտասարդների առաջնությունում։
Պոկում վարժությունում Միսակյանը բարձրացրել էր նախ 88, ապա 92 կգ կշռող ծանրաձողերը: Այս ձևում նա 4-րդ տեղն է զբաղեցրել: Հրում վարժությունում Միսակյանը գլխավերևում պահել էր 114 կգ և 118 կգ կշռող ծանրաձողերը՝ այս վարժությունում դառնալով արծաթե մեդալակիր:
Հայաստանի մյուս ներկայացուցիչ, 77 կգ քաշային Աննա Ամրոյանը երկամարտի 228 կգ արդյունքով (98+130) դարձյալ բրոնզե մեդալակիր էր նվաճել: Հրում վարժությունում նա բարձրացրել էր 126, ապա՝ 130 կգ կշռող ծանրաձողերը և արժանացել փոքր արծաթե մեդալի: Տիգրան Կարապետյանը դարձել էր Եվրոպայի երիտասարդների չեմպիոն, իսկ ծանրորդ Նարեկ Գրիգորյանը՝ Եվրոպայի երիտասարդների առաջնության
փոխչեմպիոն, Գոռ Սահակյանը՝
բրոնզե մեդալակիր:
Հիշեցնենք՝ կանանց հավաքականի անդամ, Եվրոպայի չեմպիոն, աշխարհի առաջնության բրոնզե մեդալակիր, 58 կգ քաշային Ալեքսանդրա Գրիգորյանը Եվրոպայի երիտասարդների առաջնությունում երկամարտի 214 կգ արդյունքով (91+123 կգ) դարձել էր ոսկե մեդալակիր: Պոկում վարժությունում երեք հաջող մոտեցմամբ նա բարձրացրել է 85 կգ, 89 կգ, 91 կգ կշռող ծանրաձողերը: Հրում վարժությունում մեր ծանրորդը բարձրացրել է 112 կգ, 116 կգ, 123 կգ կշռող ծանրաձողերը: Առանձին վարժություններում ևս Գրիգորյանն արժանացել է ոսկե մեդալներին:
60 կգ քաշային Գառնիկ Չոլակյանը չեմպիոնի կոչմանն արժանացել էր երկամարտի 267 կգ (120+147 կգ) արդյունքով: Առանձին վարժություններում ևս Չոլակյանը ոսկե մեդալներ է նվաճել: Պոկում վարժությունում նա գլխավերևում պահել է նախ 115, ապա 120 կգ կշռող ծանրաձողերը: Հրում վարժությունում նա հաջորդաբար բարձրացրել է 140 կգ, 145 կգ ու 147 կգ կշռող ծանրաձողերը:
Այս քաշային կարգում Հայաստանի մյուս ներկայացուցիչ Սեյրան Խուդանյանը պոկում վարժությունում գլխավերևում պահել էր 115 կգ կշռող ծանրաձողն ու արծաթե մեդալ նվաճել: Հրում վարժությունում Խուդանյանը բարձրացրել է միայն 135 կգ կշռող ծանրաձողը: Երկամարտի 250 կգ արդյունքով Խուդանյանը Եվրոպայի Մ23 տարեկանների առաջնությունում զբաղեցրել է 5-րդ տեղը:
