Երկրաշարժի հետևանքով անօթևան մնացած ընտանիքների բնակարանային ապահովում միջոցառումով նախատեսվում է լուծել 15 ընտանիքների բնակարանային խնդիրները, որի համար նախատեսվում է հատկացնել 107 միլիոն 754 հազար դրամ: Այս մասին ԱԺ մշտական հանձնաժողովների համատեղ նիստում գալիք տարվա գլխավոր ֆինանսական փաստաթղթի վերաբերյալ քննարկման ժամանակ տեղեկացրեց Լոռու մարզպետ Արեն Մկրտչյանը:
«2025-ին այս թիվը 55 միլիոն դրամ է եղել»,- հայտնեց մարզպետը: Նա տեղեկացրեց նաև, որ զգալի ավելանում են համայնքներին տրվող դոտացիաների գումարները 2026-ին:
«2025 թվականին 11 միլիարդ 270 միլիոն դրամի փոխարեն 2026-ին նախատեսված է 12 միլիարդ 759 միլիոն դրամ: Մարզի 11 համայնքներում ունենք դոտացիաների ավելացում, բացառություն են չխոշորացված երկու համայնքները՝ Ֆիոլետովոն և Լերմոնտովոն, որի մասով առանձին լուծում կա օրենսդրական կարգավորմամբ»,- ասաց Մկրտչյանը:
Ինչ վերաբերում է տարերային աղետից տուժած Ալավերդի քաղաքին ու արված աշխատանքներին, նշեց՝ Դեբեդ գետի հունի մաքրման աշխատանքներն ամբողջ ծավալով ավարտված են մասնավորապես Ձորագեսից մինչև Շնողի հատված՝ երկու փուլով:
«Առաջին մասի պատվիրատուն եղել է Լոռու մարզպետի աշխատակազմը՝ շուրջ 150 միլիոն դրամ է ծախսվել այդ ուղղությամբ, տասնյակ միավոր տեխնիկա Դեբեդի հունը մաքրել են, ինչը հնարավորություն է տալիս գետի մակարդակը որոշակի իջեցնել ու նվազեցնել այս մասով ռիսկերը»,- տեղեկացրեց Արեն Մկրտչյանը՝ հավելելով, որ նման ծավալի աշխատանքներ անգամ խորհրդային տարիներին չեն արվել:
Նրա խոսքով՝ Լոռու մարզպետի աշխատակազմը 205 հաստատված դիմում ունի անհատական բնակելի տների կամ բնակարանների փոխհատուցման մասով, և այս ուղղությամբ 802 միլիոն դրամ է հատկացվել, մասնավորապես, 609 միլիոն դրամը՝ տների կամ բնակարանների վերանորոգման մասով:
«Դա չորս փուլով է իրականացվել: Աշխատանքները մեծ մասամբ ավարտված են, այսինքն՝ այն տները, որոնք հեղեղվել էին ջրհեղեղի ժամանակ, հիմա վստահաբար կարող եմ ասել, որ շատ ավելի լավ վիճակում են գտնվում, քան մինչև ջրհեղեղը, քանի որ դրանք մեծ մասամբ խորհրդային տարիների վերանորոգմամբ տներ կամ բնակարաններ էին: Եվս 175 միլիոն դրամ հատկացվել է առաջնային անհրաժեշտության գույքի, այսինքն՝ այդ տների կահավորման ձեռքբերման նպատակով: Շարժական գույքի՝ ավտոմեքենաների մասով, մարզպետի աշխատակազմը ստացել է 166 դիմում, հաստատված են 166-ը, և ունենք 101 միլիոն դրամ փոխհատուցում այս մասով»,- նշեց Լոռու մարզպետը:
Ինչ վերաբերում է քանդված կամուրջներին, ընդգծեց՝ բոլորը վերականգնված են, մասնավորապես, Սանահին կայարան թաղամասում և Ախթալայում ավտոմոբիլային նոր կամուրջներ կան, իսկ Թումանյան փողոցի հատվածում այս պահին լայնածավալ աշխատանքներ են ընթանում երկաթբետոնե մոտ 1 կմ հենապատի կառուցման՝ 850 միլիոն դրամ նախագծանախահաշվային արժեքով, ամբողջ ֆինանսավորումը՝ պետբյուջեի միջոցներով:
Մարզպետը տեղեկացրեց՝ մի քանի լայնածավալ ծրագիր այս պահին էլ ընթացքի մեջ է մասնավորապես Ալավերդի համայնքի տարածքում:
«Դա էլ ավարտելուց և բակերի վերականգնված ծրագիրն իրականացնելուց հետո կարող ենք ասել, որ աղետի հետևանքները իսպառ վերացել են»,- խոսքը եզրափակեց մարզպետը:
