Տեսչական մարմնի կողմից ՀՀ վարչական տարածքներում նախորդ ժամանակահատվածում 276 բենզալցակայանի գործունեություն է կասեցվել, որից 71-ը գործընկեր գերատեսչությունների հետ համատեղ իրականացված աշխատանքների արդյունքում ապամոնտաժվել են: Այդ մասին ԱԺ մշտական հանձնաժողովների համատեղ նիստին ասաց ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար Գարեգին Խաչատրյանը՝ արձագանքելով «Քաղաքացիական պայմանագիր» խմբակցության պատգամավոր Արուսյակ Մանավազյանի մտահոգություններին՝ կապված հատկապես Երևանում մայթերին տեղակայված բենզալցակայանների, դրանց հակահրդեհային անվտանգության հետ, քանի որ դրանք մոտ են երթևեկելի գոտիներին ու բնակելի շենք-շինություններին:
Անդրադառնալով բենզալցակայանների համար սահմանված նորմերին առնչվող օրենսդրական փոփոխություններին` մասնավորապես դատարանի կողմից միջանկյալ դատական ակտով վարչական ակտերի կասեցման օրենքին՝ Գարեգին Խաչատրյանը հիշեցրեց, որ 2025 թվականի հունվարի 1-ից է ուժի մեջ մտել օրենքը, որի պահանջների համաձայն՝ կան բենզալցակայաններ, որոնց գործունեությունը տեսչական մարմինը դադարեցրել է:
Այս համատեքստում ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավարն անդրադարձավ նաև նոր փոփոխությանը՝ բենզալցակայանների մասով նոր տեխնիկական պահանջներին:
««Տեխնիկական անվտանգության ապահովման պետական կարգավորման մասին» օրենքի հիման վրա լիազոր մարմնի՝ ՆԳՆ-ի կողմից, այս տարի ընդունվել է ենթաօրենսդրական նորմատիվ ակտ, որով սահմանվել են բենզալցակայանների մասով նոր տեխնիկական պահանջներ, որոնք ուժի մեջ կմտնեն 2026-ի հունվարի 1-ից:
Կարևորն ի՞նչն է, որ ենթաօրենսդրական նորմատիվ ակտով նախատեսվում է, որ 1 տարվա ընթացքում նախկինում կառուցված և ներկայումս շահագործվող բոլոր բենզալցակայանները վերազինման ու վերակառուցման միջոցով իրենց օբյեկտները պետք է համապատասխանեցնեն ընդունված նոր տեխնիկական անվտանգության պահանջներին»,-ասաց նա:
