Ազգային ժողովի ֆինանսավարկային և բյուջետային հարցերի հանձնաժողովը Կենտրոնական բանկի խորհրդի անդամի պաշտոնի համար Ազգային ժողովին է առաջարկել «Քաղաքացիական պայմանագիր» խմբակցության կողմից առաջադրված Արմեն Քթոյանի թենածությունը: Այդ մասին նախագիծը ներառված է Ազգային ժողովի՝ հոկտեմբերի 23-ի նիստի օրակարգում:
Թեկնածուի կենսագրությունը խորհրդարանում ներկայացրեց «Քաղաքացիական պայամանագիր» խմբակցության պատգամավոր Արուսյակ Մանավազյանը: Ըստ այդմ՝ Արմեն Քթոյանը ծնվել է 1978 թվականին Հրազդան քաղաքում: Ավարտել է Երևանի պետական տնտեսագիտական ինստիտուտի ինժեներատնտեսագիտական ֆակուլտետը: 2003-ին պաշտպանել է թեկնածուական ատենախոսություն՝ ստանալով տնտեսագիտության թեկնածուի աստիճան:
2017 թվականի մայիսից կատարում է Հայաստանի պետական տնտեսագիտական համալսարանի վիճակագրության և տվյալագիտության ամբիոնի վարիչի պարտականությունները:
Որպես փորձագետ՝ ներգրավվել է Համաշխարհային բանկի, ՄԱԿ-ի, ԵՄ-ի, «Կոնրադ Ադենաուեր», «Ֆրիդրիխ Նաուման» հիմնադրամների, Հանրային քաղաքական հետազոտությունների, «Ամբերդ» հետազոտական կենտրոնի և մի շարք այլ հեղինակավոր կազմակերպությունների ծրագրերում ու հետազոտություններում: Գիտական հոդվածների հեղինակ է, անկուսակցական:
Արմեն Քթոյանն իր ելույթի ժամանակ նշեց, որ ԿԲ-ն դրամավարկային քաղաքականությունն իրականացնում է միջազգային փորձին համահունչ, ինչը հնարավորություն է տալիս բավականին արդյունավետ քաղաքականություն իրականացնել գնաճային սպասումների ձևավորման, իրագործման ուղղությամբ: Այդուհանդերձ, համակարգում կան խնդիրներ: Ելույթի ժամանակ նա ներկայացրեց խնդիրների վերաբերյալ իր տեսլականը, ինչպես նաև ԿԲ գործունեության մասին իր պատկերացումն առհասարակ:
«Ինչպես ժամանակին ԿԲ-ն համարվում էր թե՛ մեր տարածաշրջանում, թե՛ ավելի լայն աշխարհագրական համատեքստում առաջադեմ, նորարար ԿԲ, կարծում եմ, որ այդ հանձնառությունը, դերակատարումը պետք է վերականգնվի, և դրա համար անհրաժեշտ է մի քանի հիմնական թիրախային ուղղություններում ամրագրել առկա խնդիրները և հետևողական ու նախաձեռնող մոտեցմամբ լուծել դրանք»,- ասաց նա:
