ՀՀ Ազգային ժողովի «Քաղաքացիական պայմանագիր» խմբակցության անունից ելույթում խմբակցության ղեկավար Հայկ Կոնջորյանն արձագանքեց ընդդիմության գործընկերների որոշ ելույթների, որոնք հնչել էին ամբիոնից:
Նրա խոսքով՝ կարմիր թելով անցնում է ընդդիմության կողմից խաղաղության օրակարգի տորպեդահարումը:
Դիմելով ընդդիմադիր պատգամավոր Արծվիկ Մինասյանին՝ ասաց՝ շատ ցցուն է դրսևորումը, որ նրանք հստակորեն տորպեդահարում են խաղաղության գործընթացը, քանի որ հնարավոր չէ չնկատել այն փոփոխությունները, որոնք տեղի են ունենում և ունեցել վերջին տարիներին:
«Երբ մենք ձեզ ասում ենք՝ դուք դրական օրակարգերի թշնամին եք, և ասում ենք, որ դուք Հայաստանում ցանկացած դրական օրակարգ փորձում եք նսեմացնել, նեղանում եք, բայց իրականում այդպես է, ժողովո՛ւրդ»,- ասաց Կոնջորյանը՝ ընդդիմությանը մեղադրելով «խաղաղություն» բառից այսահարվելու համար:
«Հենց խաղաղություն բառը ասում ես, միանգամից ցնցումների մեջ են ընկնում: Նույնիսկ արդեն առանց ներքին դիսկոմֆորտի եք Հայաստանում սկսում մեղադրել պատերազմ հրահրելու մեջ»,- հայտարարեց նա:
Նրա խոսքով՝ ՀՀ երեք նախագահները՝ Լևոն Տեր-Պետրոսյան, Սերժ Սարգսյան և Ռոբերտ Քոչարյան, սուտ մատնություն են կատարել ՀՀ-ի դեմ՝ երեքն էլ մեղադրելով ՀՀ-ին պատերազմ սկսելու մեջ:
«Հետո գալիս, ասում եք՝ մեր երեք հաղթած նախագահները... Ո՞նց կարող է հաղթած նախագահները Հայաստանին մեղադրեն պատերազմ սկսելու մեջ և սուտ մատնություն իրականացնեն ՀՀ-ի դեմ»,- դիմելով ընդդիմադիրներին՝ ասաց Հայկ Կոնջորյանը:
Դիմելով դաշնակցական Արծվիկ Մինասյանին՝ նրան հորդորեց «սուրը դնել պատյանը»:
«Ձեր կռիվն ավարտված է, պարո՛ն Մինասյան»,- հավելեց նա:
