Ունենք ճանապարհների նորոգման, նոր ճանապարհների կառուցման մեծ ծավալի աշխատանքներ, և այս տարի՝ միջին նորոգման ծրագիրը, որը փաստացի սկսվել էր 2-3 տարի առաջ: Նոր որակական պահանջներ ենք դրել այդ ծրագիրն իրականացնող կազմակերպությունների առջև, և հստակ լուծվում է դիտահորերի հարցը: Ասուլիսի ժամանակ անդրադառնալով շինբարեկարգման ոլորտին՝ ասաց Երևանի քաղաքապետ Տիգրան Ավինյանը:
«Իրականացնելու ենք Գյուրջյան-Մյասնիկյան միացնող ճանապարհի շինարարական աշխատանքները՝ կամ այս տարի կսկսենք, կամ մյուս տարվա սկիզբ: Ունենք Դավթաշեն վարչական շրջանում Տիգրան Պետրոսյան փողոցին զուգահեռ ճանապարհահատվածի, Բաբաջանյան-Աշտարակ ճանապարհահատվածի մնացորդային աշխատանքները, ունենք Թբիլիսյան խճուղի-Եղվարդ ճանապարհահատվածը, որտեղ իրականացնում ենք տեխնիկատնտեսական ուսումնասիրությունը, նույնը՝ Ուլնեցու-Ռուբինյանց-Աճառյան ավտոճանապարհին: Նորք-Մարաշը Մյասնիկյան պողոտային կապող էստակադան արդեն կսկսենք իրականացնել, երբ ավարտած կլինենք Գյուրջյան-Մյասնիկյան ճանապարհը, Նորագավիթի Առաջին փողոցը Արտաշատի խճուղու խաչմերուկում էստակադայի նախագծի ֆինանսավորման հարցն ենք քննարկում Կառավարության գործընկերների հետ: Այս տարի, ամենայն հավանականությամբ, կիրականացնենք Իսակովի-Արշակունյաց ճանապարհահատվածի կառուցման հիմնարկեքը, ինչը էականորեն կնպաստի խցանումների թեթևացմանը»,- նշեց Ավինյանը:
Նա ասաց, որ շինբարեկարգման ոլորտում միայն 2024-2025 թվականներին 17 մանկապարտեզի բակեր են հիմնանորոգել: «Այս տարի շահագործման ենք հանձնելու ևս 6 մանկապարտեզ: Նախագծման փուլում է գտնվում 12 մանկապարտեզ, 5 մանկապարտեզի համար նախատեսվում է պատվիրել նախագծային փաստաթղթերի փաթեթ: Հաջորդ փուլով արդեն էներգաարդյունավետության երկրորդ ծրագրով մենք 38 հանրային շենքերում, որոնք 32 մանկապարտեզ են և 6 առողջության կենտրոն, իրականացնելու ենք այս նույն ծրագրի շարունակությունը:
Ունենք երեք նոր մանկապարտեզի կառուցման ծրագիր՝ Նոր Խարբերդում, Կորեայի ձորում և Ավան վարչական շրջանում»,- ասաց Երևանի քաղաքապետը:
«Ունենք մի քանի այգիների կառուցում, որոնք ավարտին ենք հասցրել: Նոր Նորք վարչական շրջանի Սուրբ Սարգիս եկեղեցու Դավիթ Բեկի փողոցի միջնամասի այգու կառուցումը՝ եկեղեցու ներքևի մասում՝ հսկայական տարածքում, Դավթաշենի 1-ին և 2-րդ թաղամասերում գտնվող կենտրոնական այգու կառուցումը, Նոր Նորքի 2-րդ զանգվածի Վերածննդի այգու բարեկարգման աշխատանքները, իսկ Հայրենական պատերազմի հաղթանակի 40-ամյակին նվիրված զբոսայգու հետ կապված ունեցել ենք խնդիրներ, հիմա կապալառուն շտկում է խնդիրները: Տորք Անգեղի այգին և բուսաբանական այգին իրենց բնականոն ընթացքով շարունակվում են:
Վարչական շրջաններում կառուցում ենք 115 բակ՝ 30 նոր ֆուտբոլի դաշտերով»,- նշեց Տիգրան Ավինյանը:
