Կա՞ ընդհանրապես անվտանգության երաշխիք: Իմ կարծիքով՝ կա անվտանգության երաշխիք, և անվտանգության երաշխիքը խաղաղությունն է: Խաղաղությունից բացի՝ ոչ մի ուրիշ անվտանգության երաշխիք գոյություն չունի: Մենք այսօր ունենք խաղաղություն, բայց այն ամենօրյա խնամք է պահանջում, անընդհատ ինստիտուցիոնալացում: Այդ մասին «Համապարփակ անվտանգություն և դիմակայունություն» միջազգային համաժողովի ժամանակ ասաց ՀՀ վարչապետ Նիկոլ Փաշինյանը:
«Բոլոր, նույնիսկ 50 տարի գոյություն ունեցած խաղաղություններն ինստիտուցիոնալացման կարիք ունեն, որովհետև եթե դու չես զբաղվում խաղաղության ինստիտուցիոնալացմամբ, խաղաղությունը ապաինստիտուցիոնալացվում է, քայքայվում է»,- ասաց նա:
Անդրադառնալով գարնանն արած հայտարարությանը, թե Հայաստանի և Ադրբեջանի միջև պատերազմ չի լինելու, այլ լինելու է խաղաղություն՝ արձանագրեց. «Հայաստանի և Ադրբեջանի միջև այլևս խաղաղություն է»:
