Լավ միջոցառում էր կազմակերպված, և ՀՀ տնտեսության համար օգտակար միջոցառում էր: Մթնոլորտի համար, մեր երկրի հանրաճանաչման մասով օգտակար էր, և ես ուզում եմ շնորհակալություն հայտնել բոլոր կազմակերպիչներին: Այդ մասին ճեպազրույցի ժամանակ ասաց ՀՀ էկոնոմիկայի նախարար Գևորգ Պապոյանը՝ անդրադառնալով համաշխարհային փոփ աստղ Ջենիֆեր Լոպեսի հայաստանյան մենահամերգին:
«Միջոցառումն անցավ փայլուն, մենք շատ զբոսաշրջիկներ ունեցանք, և երբ օգոստոսին ամփոփենք, այդ թվերը կերևան»,- ասաց նա:
Մեջբերելով իտալահայկական կոնսորցիումի հետազոտությունը, ըստ որի՝ Ջենիֆեր Լոպեսի մենահամերգի վրա ծախսված 6 մլն դոլարի դիմաց ստացվել է ավելի քան 13,3 մլն դոլար՝ լրագրողը նկատեց՝ դա մտել է ոչ թե կառավարության բյուջե, այլ ՀՀ տնտեսություն, որից 10-20 տոկոսն է ԱԱՀ:
Նախարարն արձագանքեց դիտարկմանը. «Ի՞նչ տարբերություն՝ որտեղ է մտել: Այդ 470 դոլարանոց տոմսը ՀՀ տնտեսություն չի՞ մտնում, կամ ռեստորանում փակված 200 դոլար հաշիվը ՀՀ տենտեսություն չի՞ մտնում:
Եթե եկել է ՌԴ-ից զբոսաշրջիկ և գնել է 470 դոլարանոց տոմս (ես գիտեմ, որ հատկապես թանկ տոմսերը զբոսաշրջիկներն են գնել), ի՞նչ եք կարծում՝ 470 դոլարանոց տոմս գնած զբոսաշրջիկը հյուրանոցի ի՞նչ համարում է մնում՝ 50 դոլարանո՞ց, թե՞ 300 դոլարանոց: Ակնհայտ է, չէ՞: Կամ ռեստորան գնո՞ւմ է, թե՞ չէ…
Ինչ հաշվում են, հաշվում են տնտեսություն մտած փողը, ոչ թե՝ պետական բյուջե, որովհետև ռեստորանատիրոջ եկամուտն ինձ հետաքրքիր է, որովհետև տնտեսության եկամուտ է, սրճարանի տիրոջ եկամուտն ինձ հետաքրքիր է, որովհետև դա մեր տնտեսության եկամուտն է, հյուրանոցը, օդանավակայանը և այսպես շարունակ»:
Հիշեցնենք, որ օգոստոսի 3-ին Երևանի Վազգեն Սարգսյանի անվան Հանրապետական մարզադաշտում տեղի էր ունեցել համաշխարհային փոփ աստղ Ջենիֆեր Լոպեսի մենահամերգը: Ըստ Ջենիֆեր Լոպեսի համերգի կազմակերպիչների՝ Հայաստան է եկել 15000 զբոսաշրջիկ։ Ըստ իտալահայկական կոնսորցիումի տվյալների՝ զբոսաշրջային փաթեթ ունեցողները, Հայաստան գալով, միջինում ծախսում են 888 դոլար, հետևաբար, հենվելով այս հետազոտության վրա, կարող ենք պնդել, որ այս համերգի վրա ծախսված 6 մլն դոլարի դիմաց ստացել ենք ավելի քան 13,3 մլն դոլար գումար։ Սրա մեջ ներառված չեն բազմաթիվ այլ արդյունքներ, ինչպիսիք են, օրինակ՝ երկրի հանրահռչակման արդյունքում ստացվող էֆեկտները։
