Վերջերս մեր նախորդ բանախոսությունների ժամանակ ինձ շատ օգնեց Վիգեն Ավետիսը՝ քանդակագործը, որը մեր բանախոսության հյուրն էր։ Այս մասին «Կրթվելը նորաձև է» շարժման հանդիպման ժամանակ ասաց ՀՀ վարչապետ Նիկոլ Փաշինյանը՝ անդրադառնալով իրական Հայաստանի գաղափարախոսությանը։
«Ինքը պատմում էր իր արվեստի, իր քանդակագործությունների մասին և մի այսպիսի նախադասություն ասաց՝ ես այսինչ թվականին գնացի Ֆլորենցիա և ասացի՝ բարև, Ֆլորենցիա, ես եկել եմ, ի՞նչ ունես ինձ ասելու, Ֆլորենցիան ինձ ասաց՝ սա, սա սա և այլն։
Հետո գնացի Միքելանջելոյի գերեզմանին և ասացի՝ բարև, Միքելանջելո, ինչ ունես ինձ ասելու, նա ինձ ասաց սա, սա։
Այնուհետ նա քանդակեց Նեֆերտիտիի արձանը, և նա արձանի քարի հետ խոսում էր, թե ինչ ունես ասելու, ինչ ես մտածում քարի հետ։
Եվ այդ միտքը ինձ շատ օգնեց»,- ասաց վարչապետը։
Նրա խոսքերով՝ շատ են խոսում այն մասին, որ իրական Հայաստանի գաղափարախոսությունը մեր ինքնությունը նենգափոխելու, մեր պատմությունը փոխելու, պատմական Հայաստանը ուրանալու մասին է, մինչդեռ իրականում ուղիղ հակառակն է։
«Որովհետև ես, Վիգեն Ավետիսին նմանակելով, ասացի՝ իրական Հայաստանի գաղափարախոսությունը իմ և պատմական Հայաստանի խոսակցության արդյունքն է, իմ և հայ ժողովրդի պատմության ընթերցանության և խոսակցության արդյունքն է, որովհետև ես հատկապես 2020թ․ նոյեմբերի 9-ից հետո գնացի և ասացի՝ պատմական Հայաստան, ես Հայաստանի վարչապետն եմ, ի՞նչ ունես ինձ ասելու։ Եվ պատմական Հայաստանն ինձ ասաց՝ մի գնացեք իմ ճանապարհով։
Մի գնացեք այն ճանապարհով, այս երկիրը Աստվածաշնչում է գրված, որտեղ կաթ ու մեղր է հոսում, մի գնացեք այս երկիրը պատմական Հայաստան դարձնելու ճանապարհով։
Ես ասացի՝ Հայ ժողովրդի պատմություն, բարև, ես Հայաստանի վարչապետն եմ, ի՞նչ ունես ինձ ասելու, հայ ժողովրդի պատմությունն ինձ ասաց՝ մի կրկնեք ինձ, պետք չէ ինձ կրկնել։ Կարդացեք ինձ, սովորեք ինձ, բայց հետևություններ արեք։
Հետևաբար, Իրական Հայաստանի գաղափարը իմ և պատմական Հայաստանի խոսակցության արդյունքն է, իմ և հայ ժողովրդի խոսակցության արդյունքն է։ Եվ այդ խոսակցության արդյունքում է ծնվել այս թեզը՝ «Հայրենիքը պետությունն է։ Սիրո՞ւմ ես հայրենիքդ, ուժեղացրու՛ պետությունդ»,- նշեց վարչապետը։
