Սիրիայում բեդվին ցեղերի և զինյալների միջև բախումներ են տեղի ունեցել հիմնականում դրուզներով բնակեցված Սուվեյդա քաղաքում, ինչի հետևանքով զոհվել է առնվազն 37 մարդ: Իրավապաշտպանների տվյալներով՝ մահացածներից 27-ը դրուզ են, այդ թվում՝ երկու երեխա, 10-ը՝ բեդվին: Սիրիայի իշխանությունները զորք են ուղարկել մարտական գոտի՝ հակամարտությունը լիցքաթափելու համար, փակվել է Դամասկոս-Սուվեյդա մայրուղին։
Սա տարածաշրջանում բռնության առաջին խոշոր բռնկումն է ապրիլ-մայիս ամիսներից ի վեր, երբ դրուզ համայնքի անդամների և անվտանգության ուժերի միջև բախումների հետևանքով տասնյակ մարդիկ զոհվեցին։
Պետական «ՍԱՆԱ» լրատվական գործակալությունն ավելի վաղ հայտնել էր, որ Դարաա և Սուվեյդա նահանգների միջև վարչական սահմանին անվտանգության ուժեր են տեղակայվել՝ իրավիճակին ի պատասխան։ Սուվեյդայի նահանգապետը կոչ է արել բնակիչներին «զսպվածություն ցուցաբերել և արձագանքել բարեփոխումների ազգային կոչերին»։
Սիրիայի ներքին գործերի նախարարությունը հայտնել է զորքերի տեղակայման մասին՝ պաշտպանության նախարարության հետ համակարգված։ Հայտարարության համաձայն՝ այդ ուժերը «կսկսեն տարածաշրջանում անմիջական միջամտություն՝ հակամարտությունը լուծելու, բախումները դադարեցնելու, կարգուկանոնը վերականգնելու, մեղավորներին քրեական պատասխանատվության ենթարկելու համար»։
