Իսրայելական բանակը Իրանին հարվածների ժամանակ օգտագործել է պայթուցիկներով անօդաչու թռչող սարքեր, որոնք արձակվել են անմիջապես Իրանի տարածքից: Այս մասին հայտնել է Ynet պորտալը՝ հղում անելով անվտանգության ոլորտի աղբյուրին:
Նրա տեղեկություններով՝ իսրայելական «Մոսադ» հետախուզությունն Իրանի դեմ ռազմական գործողության մեկնարկից շատ առաջ կարողացել է Թեհրանի մոտակայքում գաղտնի բազա ստեղծել՝ տեղակայելով կամիկաձե դրոններ:
Ynet-ի աղբյուրի խոսքով՝ անօդաչու թռչող սարքերն ակտիվացվել են հունիսի 12-ի լույս 13-ի գիշերը, երբ Իսրայելի ռազմաօդային ուժերը սկսել են հարվածել Իրանին: Սարքերը կիրառվել են Իրանի ներսում գտնվող կարևոր ռազմաբազաներից մեկում հրթիռային կայանքները ոչնչացնելու համար:
Իրանին ուղղված հարվածների մեկնարկից հետո իր առաջին մեկնաբանության մեջ Իսրայելի բանակի պաշտոնական ներկայացուցիչ Էֆի Դեֆրինը զորքերի գործողությունները բնութագրել է որպես «կանխարգելիչ, կետային, համակցված հարձակողական գործողություն»:
