Կառավարության այսօրվա նիստում գլխավոր դատախազ Աննա Վարդապետյանը անդրադարձավ գործադիրի նախորդ որոշումներով դատախազության տարբեր լիազորությունների շրջանակում պետությանը ամրացված գույքերին:
Նա նշեց, որ մեկ շաբաթ առաջ ՇՄՆ-ին է ամրացվել 2 հողատարածք, որոնք գտնվում են մայրաքաղաքի հեռուստաաշխատարակին հարող տարածքում: «2 հողատարածքների ընդհանուր արժեքը 1.5 մլն դոլար է: Ինչո՞ւ ենք ամրացրել ՇՄՆ-ին: Որովհետև անտառային նշանակության հողատարածքներ են: Նախարարության հետ քննարկումների արդյունքում այս փուլում հանգել ենք եզրահանգման, որ որևէ շինարարություն տարածքում չի իրականացվելու, և տարածքն օգտագործվելու է որպես անտառային նշանակության օգտագործելու համար: Սա ևս պետական շահերի պաշտպանության գործառույթի շրջանակում վերադարձված գույք է:
Նշեմ, որ 2005 թվականի մայիսի 2-ին և 2005 թվականի հունիսի 30-ին կնքվել են առուվաճառքի պայմանագրեր Երևանի նախկին քաղաքապետի և ֆիզիկական անձանց միջև: Հակակոռուպցիոն դատարանը բավարարել է պետական շահերի պաշտպանության երկու հայցերը և անվավեր է ճանաչել առուվաճառքի պայմանագրերը ու կիրառել անվավերության հետևանքները: Այդ գույքերը անցյալ շաբաթ ամրացվել են ՇՄՆ-ին»,- ասաց դատախազը:
Նա հայտնեց, որ առաջիկայում Կառավարության նիստով կներկայացվի և լիազոր մարմնին կամրացվի Կոտայքի մարզի Ծաղկաձոր քաղաքի Մհեր Մկրտչյան փողոցի 30/1 հասցեում գտնվող՝ շուրջ 1 մլն դոլար շուկայականին մոտարկված կադաստրային արժեքով 2.3 հա մակերեսով հողամասը: «2024 թվականի հունվարի 12-ի վճռով Հակակոռուպցոիոն դատարանը բավարարել էր մեր Գլխավոր դատախազության հայցն ընդդեմ Սամվել Մայրապետյանի, և հայցով մենք պահանջել էինք անվավեր ճանաչել առուվաճառքի պայմանագիրը, աճուրդը և կիրառել անվավերության հետևանքներ: Դատարանը բավարարել է մեր հայցը, վճիռը մտել է օրինական ուժի մեջ: Առաջիկայում ըստ նպատակային նշանակության գույքը կամրացվի Կառավարության լիազոր մարմնի»,- ասաց Աննա Վարդապետյանը:
«Մենք պարբերաբար այս հայցերի մասին հանդես ենք եկել պաշտոնական հաղորդագրություններով, տեղեկացնում ենք Կառավարության մեր գործընկերներին, որ նման գույքեր կան վերադարձված, և գույքերը անհրաժեշտ է ըստ իրենց նպատակային նշանակության կիրառել»,- նշեց Վարդապետյանը:
Նա անդրադարձավ վերջին 2 ամիսների ընթացքում մի շարք համայնքներում համայնքային շահերի պաշտպանության գործառույթի շրջանակներում վերադարձված գույքերին: «Իջևան և Դիլիջան համայնքներին վերադարձվել են մանկապարտեզների տարածքներ, մասնավորապես, Տավուշի մարզի դատախազությունը կրկին պետական համայնքային շահերի պաշտպանության լիազորության շրջանակում ուսումնասիրել էր Տավուշի մարզի Իջևան համայնքի Խաշթառակ բնակավայրին սեփականության իրավունքով պատկանող՝ 9-րդ փողոց 11 հասցեում գտնվող 198.45 քմ մակերեսով համայնքի մանկապարտեզի մասնաշենքի փաստաթղթերը»,- նշեց Աննա Վարդապետյանը:
«Շատ հաճախ ինչպես ենք մենք իմանում այս կամ այն համայնքային նշանակության գույքը մասնավոր անձանց պատկանելու մասին: Այդ հիմքը քաղաքացիների դիմումներն ու հաղորդումներն են, որոնց մենք ստանում ենք տարբեր եղանակներով՝ ինչպես սոցկայքերի միջոցով, այնպես էլ գրավոր փաստաթղթերով: Ուսումնասիրության արդյունքում նույն սխեման էր վեր հանվել. 2017 թվականի փետրվարի 27-ին Խաշթառակ գյուղական համայնքը, ի դեմս համայնքի ղեկավարի, կնքել էր անշարժ գույքի վարձակալության պայմանագիր: Մեզ շատ հետաքրքրել էր պայմանագրի արժեքը՝ տարեկան 165 հազար դրամ վարձավճար: Երբ մենք բաժանեցինք ամիսների, դա մոտավորապես 13 750 դրամ էր կազմում ամսական, և 25 տարի ժամկետով վարձակալության էր հանձնվել մանկապարտեզի մասնաշենքը: Նաև նյութերի ուսումնասիրությամբ պարզվել էր, որ 2017 թվականի փետրվարի 27-ին կնքված պայմանագրի հետևանքով, փաստորեն, վարձակալության հանձնված անշարժ գույքը չէր ներառվել 2023 թվականի հոկտեմբերի 24-ին մեկնարկած՝ մանկապարտեզի հիմնանորոգման աշխատանքների մեջ, արդյունքում մանկապարտեզը հիմնանորոգվել էր կիսատ: Մանկապարտեզի այս խնդրի վերաբերյալ գրությամբ տեղեկացվել է համայնքի ղեկավարը, այս պահին անշարժ գույքի վարձակալության պայմանագիրը լուծված է, և մենք նաև համայնքին տեղեկացրել ենք, որ անհրաժեշտ է հետագա հիմնանորոգման աշխատանքներում ներառել նաև այդ տարածքը: Նշեմ, որ մանկապարտեզի՝ շուկայականին մոտարկված կադաստարային արժեքը 44 մլն 121 հազար դրամ է»,- ասաց գլխավոր դատախազը:
Անդրադառնալով Դիլիջան համայնքի Շահումյան փողոցի 34 հասցեում գտնվող՝ 891.1 քմ մակերեսով մանկապարտեզի մասնաշենքին՝ նշեց, որ մանկապարտեզն արժե մոտավորապես 85 մլն 935 հազար դրամ: Դա կրկին շուկայականին մոտարկված կադաստրային արժեքն է:
2025 թվականի մայիսի 12-ին Գեղարքունքի մարզի Մարտունի համայնքի սեփականության իրավունքն է վերականգնվել Գեղարքունիքի մարզի Մարտունի համայնքի Գետափնյա 2-րդ փողոց 22 հասցեում գտնվող՝ շուրջ 321 հազար դոլար շուկայականին մոտարկված կադաստրային արժեքով 6,5 հա մակերեսով մարզադաշտի նկատմամբ:
Կառավարության որոշմամբ ստեղծված Վերականգնված միջոցների միասնական հաշվին ստեղծման օրվանից՝ 2024 թվականի դեկտեմբերի 5-ից առ այսօր մուտք է եղել 44 միլիոն 177 հազար ԱՄՆ դոլարին համարժեք 16 միլիարդ 953 միլիոն 382 հազար դրամ:
Վարդապետյանը հիշեցրեց, որ Կառավարության՝ 2024 թվականի դեկտեմբերի 5-ի որոշմամբ՝ քրեական վարույթներով պետությանը, համայնքին, պետական կամ համայնքային մասնակցությամբ կազմակերպություններին կամ պետական կամ համայնքային ոչ առևտրային կազմակերպություններին պատճառված վնասի վերականգնման նպատակով դրամական միջոցները վճարվում են Ֆինանսների նախարարության կողմից կառավարվող՝ Վերականգնված միջոցների միասնական հաշվին: Հանրային հաշվետվողականության նկատառումներից ելնելով՝ Գլխավոր դատախազության կողմից կիսամյակային պարբերականությամբ տեղեկատվություն է հրապարակվելու քրեական վարույթներով հաշվետու ժամանակահատվածում վերականգնված դրամական միջոցների, ինչպես նաև որպես գույք արգելադրված Հայաստանի Հանրապետության դրամի վերաբերյալ՝ ըստ նախաքննական մարմինների տարբերակման:
Ապօրինի ծագում ունեցող գույքի բռնագանձման գործառույթի շրջանակում, 2021 թվականից առ այսօր, Հակակոռուպցիոն դատարանի վարույթում գտնվող 152 հայցադիմումով արգելանք է դրվել շուրջ 1500 անշարժ գույքի, 290 շարժական գույքի, 400 իրավաբանական անձանցում մասնակցության իրավունքի, 540 միլիարդ դրամի վրա: Արգելադրված գույքերի և իրավաբանական անձանցում մասնակցության արժեքը դեռևս գնահատված չէ:
«152 հայցադիմումով ընդհանուր հայցագինը գերազանցում է շուրջ 600 միլիարդ դրամը: 5 հայցադիմումի վերաբերյալ կայացվել են դատական ակտեր, որոնք դեռևս օրինական ուժի մեջ չեն մտել՝ բողոքարկվել են ինչպես Գլխավոր դատախազության, այնպես էլ պատասխանողների կողմից:
Հիշեցնեմ, որ 2023-2024 թվականների ընթացքում Գլխավոր դատախազությունն ապօրինի ծագում ունեցող գույքի բռնագանձման գործառույթի շրջանակում կնքել է հաշտության 8 համաձայնություն, որոնցով Հայաստանի Հանրապետությանն է փոխանցվել 7 անշարժ, 2 շարժական գույք, 2025 թվականի հունիսի 3-ի դրությամբ՝ 815 միլիոն 200 hազար ՀՀ դրամ և 50 հազար 720 եվրո: Անշարժ գույքերի շուկայական արժեքը գերազանցում է 4 միլիարդ 200 միլիոն դրամը: 2024 թվականին օրինական ուժի մեջ է մտել ապօրինի ծագում ունեցող գույքի բռնագանձման հայցադիմումն ամբողջությամբ բավարարելու վերաբերյալ 1 վճիռ: Վճռով Հայաստանի Հանրապետության սեփականության իրավունքն է գրանցվել Երևան քաղաքի Վարդանանց փողոցում գտնվող 1 բնակարանի և Կոտայքի մարզի Առինջ համայնքում գտնվող 1 բնակելի տան նկատմամբ (գույքերը 2025 թվականի ապրիլի 10-ին ամրացվել են ՏԿԵՆ պետական գույքի կառավարման կոմիտեին)»,- նշեց գլխավոր դատախազը:
Հավելենք նաև, որ 2018-2024 թվականների ընթացքում ընթացիկ և ավարտված քրեական վարույթներով (նախաքննության փուլ), դատարաններում ավարտված քրեական գործերով, պետական և համայնքային շահերի պաշտպանության հայցերով ու հաշտություններով, Զինվորական դատախազության կողմից կիրառված դատախազական ներգործության միջոցներով, իսկ 2023 թվականից՝ նաև ապօրինի ծագում ունեցող գույքի բռնագանձման գործիքակազմի կիրառման արդյունքում Հայաստանի Հանրապետությանն է վերադարձվել շուրջ 210 միլիարդ 79 միլիոն դրամի (536 միլիոն 216 հազար ԱՄՆ դոլարի) գույք և դրամական միջոց, որից 46 %-ը կամ 96 միլիարդ 934 միլիոն դրամի (247 միլիոն 773 հազար ԱՄՆ դոլարի) գույքն ու դրամական միջոցը՝ 2023 և 2024 թվականներին»,- ասաց Աննա Վարդապետյանը:
