Մենք ունենք անձանց խումբ, որոնք ապօրինի կերպով ազատությունից զրկված են, գաղափարն այն է, որ, միանշանակ, բոլորի իրավունքների պաշտպանությունը պետք է առաջնահերթ լինի։ Այդ մասին Կառավարությունում լրագրողներին ասաց ՄԻՊ Անահիտ Մանասյանը՝ անդրադառնալով Ադրբեջանում պահվող հայերի խնդրին։
«Իհարկե, մտահոգությունները շատ են՝ սկսած խոշտանգումների կամ վատ վերաբերմունքի այլ ձևերի հնարավոր իրավիճակներից և այլն»,- ասաց ՄԻՊ-ը:
Անահիտ Մանասյանի խոսքերով՝ Ադրբեջանում չի կարելի պատկերացնել անկախ և անկողմնակալ դատավարություն հայերի նկատմամբ:
«Այս առումով նաև ողջունում եմ ՄԱԿ-ի մարդու իրավունքների բարձրագույն հանձնակատարի հայտարարությունը հարցի հետ կապված՝ մասնավորապես Ադրբեջանում կամայականորեն ազատությունից զրկված բոլոր անձանց, այդ թվում՝ էթնիկ հայերի ազատ արձակման մասով»,- նշեց ՄԻՊ-ը։
Հիշեցնենք՝ ՄԱԿ-ի Մարդու իրավունքների գերագույն հանձնակատար Վոլկեր Տյուրկը Մարդու իրավունքների խորհրդի 58-րդ նիստում կոչ էր արել անհապաղ ազատ արձակել Ադրբեջանում պահվող հայ գերիներին։
