Բաքվում պահվող հայերի նկատմամբ խոշտանգումների մասին տեղեկություններն արդեն իսկ բացահայտ են՝ լրագրողների հետ զրույցում հայտարարել է վարչապետը: Նիկոլ Փաշինյանը նշել է, որ մինչև այս չէին ուզում հայտարարություններով սադրել խոշտանգումներ, արգելված միջոցների կիրառում: Այժմ, վարչապետի խոսքով, այլևս սադրել չեն կարող, որովհետև դա արդեն տեղի է ունեցել:
Երկրի ղեկավարը հիշեցրել է, որ խնդրի կապակցությամբ ինքը, նաև արտգործնախարարությունը հանդես են եկել հայտարարություններով, որոնք հստակ գնահատական են տալիս, և այդ ուղղությամբ արվում են հնարավոր դիվանագիտական աշխատանքներ:
«Մենք բոլոր բանակցություններում այդ հարցը բարձրացնում ենք, ընդ որում՝ մենք այդ հարցերը բարձրացնում ենք նաև Ադրբեջանի հետ բանակցություններում, և այդ ուղղությամբ գործադրվում են ջանքեր, որոնք չեն երևում»,- ասել է Նիկոլ Փաշինյանը:
