Փաստը, որ Հայաստանը Ադրբեջանից ստացել է խաղաղության պայմանագրի 12-րդ խմբագրությունը՝ վկայություն է, որ գործընթացը փակուղում չէ: ՔՊ խմբակցության հետ հանդիպումից հետո, պատասխանելով լրագրողների հարցերին, ասել է վարչապետ Նիկոլ Փաշինյանը, հավելել՝ հիմա Հայաստանը պետք է իր առաջարկները ներկայացնի: Անդրադառնալով չհամաձայնեցված երկու հոդվածներին՝ Փաշինյանն ասել է՝ առաջինը վերաբերում է սահմանի երկայնքով 3-րդ երկրների ուժերի տեղակայմանը, մյուսը՝ միջազգային ատյաններում իրավական և այլ դիվանագիտական վեճերին, բանավեճերին:
«Այսինքն՝ պրոցեսը գնում է: Մյուս կողմից պետք է արձանագրենք, որ նաև տեղյակ եք, որ սահմանազատման հանձնաժողովներն են աշխատում, հանդիպել են այս տարի արդեն մեկ առերես հանդիպում ունեցել, մեկ առցանց հանդիպում են ունեցել: Եվ այո, դուք ճիշտ եք, մենք նաև ներկայացրել ենք առաջարկ: Գիտեք, դա նույնիսկ առաջարկ չի, մենք առաջարկել ենք լուծում: Լուծում: Ես ուզում եմ սա շատ կարևոր է արձանագրել՝ մենք առաջարկել ենք լուծում, և մենք հույս ունենք, որ Ադրբեջանը դրական կարձագանքի այդ լուծմանը: Որտեղ ես, ճիշտն ասած, շատ վերլուծում եմ և ուզում եմ հասկանալ՝ իսկ ինչու պետք է Ադրբեջանը բացասական արձագանքի մեր այդ լուծման առաջարկին: Եվ իհարկե, մի քիչ չեմ վերապահի ինձ Ադրբեջանի փոխարեն պատասխանել, բայց օբյեկտիվ վերլուծությունը ցույց է տալիս, որ մերժելու հիմքեր ուղղակի չկա: Վերաբերում է Սյունիքի ճանապարհին էդ առաջարկը, և այդ պարզեցված ընթացակարգը վերաբերում է երկաթուղային փոխադրումներին, տարածաշրջանային Հայաստանի և Ադրբեջանի միջև երկաթուղային փոխադրումները, երկաթուղային տրանսպորտը վերականգնելու, որը այդ թվում կօգտագործվի Ադրբեջանից Ադրբեջան, այսինքն՝ արևմտյան Ադրբեջանից դեպի Նախիջևան Հայաստանի ինքնիշխան տարածքով դեպի Նախիջևան կապի և Հայաստանից Հայաստան՝ Երասխից Մեղրի: Եվ երկու երկրները հնարավորություն կունենան ըստ այդմ նաև միմյանց տարածքով անցնող երկաթուղիները օգտագործել միջազգային բեռնափոխադրումների համար: Խոսքը գնում է երկաթուղային բեռնափոխադրումների մասին»,- ասել է վարչապետը։
