ՀՀ-ն, արտահայտելով ՀՀ ժողովրդի կամքը, խնդիր դնելով ՀՀ-ն դարձնել անվտանգ, ապահով, զարգացած, բարեկեցիկ երկիր, հայտարարում է ԵՄ-ին ՀՀ-ի անդամակցելու գործընթացի մեկնարկը: Այդ մասին ԱԺ-ում ասաց Եվրամիությանը Հայաստանի անդամակցության գործընթացի մեկնարկի նախաձեռնող խմբի լիազոր ներկայացուցիչ Արտակ Զեյնալյանը՝ առաջին ընթերցմամբ ներկայացնելով համապատասխան՝ «ԵՄ-ին ՀՀ-ի անդամակցության գործընթաց մեկնարկելու մասին» օրենքի նախագիծը:
«Այն կկանխորոշի ՀՀ իշխանությունների որոշումների և գործելակերպի ուղղվածությունն ու մասշտաբը: Աշխարհաքաղաքական ստեղծված իրավիճակում օրենքը, նրա ընդունման ձևը և միջոցը կմեծացնեն ՀՀ-ի ինքնիշխանության ամրապնդումը, դիմակայությունը»,- ասաց Արտակ Զեյնալյանը՝ նշելով, որ օրենքի ընդունումը կնպաստի տարածաշրջանում խաղաղության և կայունության հաստատմանը ուժերի հավասարակշռության վերականգնման միջոցով, ՀՀ ազգային անվտանգության ապահովման հնարավորությունների մեծացմանը, ՀՀ ազգային բանակի համապատասխանեցմանը ԵՄ անդամ երկրների բանակների արդիական չափանիշներին, մարդու իրավունքների շարունակական զարգացմանը և պաշտպանությանը, տնտեսական անվտանգության մեխանիզմների ստեղծմանը գործող մենաշնորհների վերացմամբ, տնտեսության բազմազանեցմամբ, որը հնարավոր է միայն Արևմուտքի և ԵՄ-ի հետ համագործակցությամբ:
«Քաղաքացիական պայմանագիր» խմբակցության պատգամավոր Լիլիթ Հակոբյանը կարծում է՝ պետք է քաղաքացիներին բացատրել, թե ինչ ակնկալիքներ կարող են ունենալ այս գործընթացից: Ըստ պատգամավորի՝ հարցումները ցույց են տալիս, որ գործընթացի հետ կապված՝ քաղաքացիներն ընտանեկան նորմերի հնարավոր վատթարացում են տեսնում, նաև մտավախություն ունեն, որ գործընթացը դեմ է ՀՀ-ի՝ ՀԱՊԿ անդամակցությանը:
Զեյնալյանը թեև չբացառեց, որ նման կարծիք կարող է լինել, բայց նաև նկատեց, որ քաղաքացիները գիտակից են, գրագետ ու ամեն բան հասկանում են. «Ի՞նչ եմ ե՛ս տեսել: Մարդիկ «Եվրոպա» ասելով հասկանում են ազատություն, մարդու իրավունքներ, բարձրորակ բժշկական սպասարկում՝ գիտականորեն հինավորված, հասկանում են կրթություն, ճաշակ, բարեկեցություն, խաղաղություն, ապահովություն, նաև շատ բարձրորակ, բարձրտեխնոլոգիական զենք և զինամթերք, լավորակ կառավարում: Մեր հանդիպած քաղաքացիների մեծամասնությունն այսպես է ընկալում ԵՄ-ն»:
Հիշեցնենք՝ տարեսկզբին Կառավարությունը հավանություն էր տվել Եվրամիությանը Հայաստանի անդամակցության գործընթացի մեկնարկի մասին որոշման նախագծին: Նախաձեռնության հեղինակները նախքան նախագիծն Ազգային ժողովի քննարկմանը ներկայացնելը անհրաժեշտ 50 հազարի փոխարեն հավաքել էին 60 հազար ստորագրություն։
