Շարունակվում է ՀՀ ԱԺ ութերորդ գումարման ութերորդ նստաշրջանի հերթական նիստը:
Արտահերթ ելույթով հանդես եկավ ԱԺ նախագահ Ալեն Սիմոնյանը, որն իր խոսքում անդրադառնալով ընդդիմադիր պատգամավորների՝ իշխող ուժի հասցեին հնչող կոռուպցիոն բնույթի մեղադրանքներին՝ նկատեց՝ ընդդիմադիրների համարձակությունից է ուզում կոռուպցիայի մասին խոսելիս:
«Ընդհանրապես, որ կոռուպցիայի մասին խոսում եք, և դուք դահլիճում եք, մեծ համարձակություն է: Նոր մարտավարությունը, որ որդեգրել եք, բավականին հետաքրքիր է»,- նկատեց ԱԺ նախագահը:
Նրա խոսքով՝ մարդիկ այդ ամենը հիշում են:
«Ժողովո՛ւրդ, դուք ամենակոռումպացված թեմաների շուրջ մեղադրանքներ ունեցող խմբակցությունն («Հայաստան» խմբակցության մասին է - խմբ.) եք: Ձեզ այն փողերը, որ կայքերը, շենքերը առնում եք, միտինգները կազմակերպում եք, դրանք որտեղի՞ց: Պարո՛ն Քոչարյան (պատգամավոր Լևոն Քոչարյան - խմբ), կասե՞ք՝ ինչքան գումարի է տիրապետում Քոչարյան ընտանիքը: Արցախի՞ց էիք բերել այդ գումարները, Հյուսիսային պողոտայի տները: Իրականությունն այն է, որ ՀՀ խոպան էիք եկել, և այստեղ էլ մարդկանց վերաբերվում էիք որպես ....»,- հարցրեց Սիմոնյանը՝ դիմելով ընդդիմադիր պատգամավորին:
Ինչ վերաբերում է Լևոն Քոչարյանի՝ տեղից իրեն հակադարձելուն, Ալեն Սիմոնյանը խնդրեց իրեն չընդհատել:
«Եկել էիք, ՀՀ անվտանգությունից էիք խոսում: Երբ բանակը թալանում էիք, ում ինչ ասես, որտեղ ասես նշանակում էիք, մարդկանցից բիզնեսները խլում էիք, փայ էիք մտնում, հիմա եկել կոռուպցիայի՞ց եք խոսում: Կարո՞ղ է նորություն եմ ասում»,- ընդդիմադիր գործընկերներին հարց ուղղեց ԱԺ նախագահը՝ հորդորելով իր հետ տեղից բանավեճի մեջ չմտնել:
Ինչ վերաբերում է մեղադրանքներին, թե հղի կնոջը (Սոնա Մնացականյան - խմբ.) իրենց իշխանության օրոք են գցել ավտոմեքենայի տակ, Սիմոնյանը ամբիոնից ցուցադրեց Պողոս Պողոսյանի լուսանկարը:
«Պողոս Պողոսյանը մեր հարգարժան Լևոն Քոչարյանի հորն անունով դիմելու համար զուգարանում ծեծվել և սպանվել է: Ի դեպ, դաշնակցական է: Ես ուզում եմ հասկանամ՝ հիմա դաշնակցականները ինչ-որ «պրետենզիա» ունեցե՞լ են այս մարդու հետ կապված: Մեր գործընկերներից մեկի՝ տիկին Քլոյանի եղբորը Մարտի 1-ին գնդակահարել են Երևանի կենտրոնում: Երևան քաղաքի կենտրոնը սարքել էիք ճակատամարտի դաշտ»,- հայտարարեց ԱԺ նախագահը:
Սիմոնյանի խոսքերից հետո դահլիճում աղմուկ բարձրացավ, ինչից հետո ԱԺ նախագահի տեղակալ Հակոբ Արշակյանը հորդորեց հանդարտություն պահպանել:
Սիմոնյանն իր հերթին հորդորեց ընդդիմադիրներին դուրս գալ դահլիճից:
«Երբ խոսք է գնում կոռուպցիայից և մարդ սպանելուց, բոյկոտեք: Այն 10 տարում, երբ դուք իշխանության եք եղել, մարդկանց մեջ այնպիսի հետք է թողել, մոռացե՛ք: Հովիկ Աղազարյանն ավելի շուտ կդառնա իշխանություն, քան դուք»,- խոսքը եզրափակեց Ալեն Սիմոնյանը:
