Ավելի քան 3.5 միլիարդ դրամի ներդրում, 300 նոր աշխատատեղ ու էկոտուրիզմի, զբոսաշրջության զարգացում. 2022 թվականին անտառային տարածքների վարձակալության 900 հայտ է ներկայացվել: Անտառային կոմիտեն քննում է դրանք, հավանություն տալիս հավակնոտ և ներդրումային ծրագրերին:
Վլադիմիր Կիրակոսյան (ՀՀ ՇՄՆ անտառային կոմիտեի նախագահ) - Նախկին բոլոր վարձակալական պայմանագրերի մեջ առկա չի եղել ոչ մի ներդրում, այսինքն՝ մենք ունեցել ենք 0 ներդրում, 0 աշխատատեղի հիմնում և ինչ ենք ունեցել. ունեցել ենք անբարենպաստ պայմաններ, որտեղ անտառային օրենսգրքով, պայմանագրով խախտվել է, որ իրենք էդ տարածքը պետք է աղբահանությունն իրականացնեն, պետք է ոչ մի ծառ և թուփ չվնասեն, արմատախիլ չանեն:
Ոլորտում առկա խնդիրները լուծելու համար մոտ մեկ տարի դադարեցվել էր անտառային տարածքների վարձակալության տրամադրման գործընթացը: 2022-ի աշնանը ոլորտը վերահսկող կառույցը հայտարարեց՝ գործընթացը վերսկսում են, բայց պարտադիր ու կարևոր պայմաններով:
Վլադիմիր Կիրակոսյան - 2022 թվականին ՇՄ նախարարի հրամանով պայմանագրերի նոր ձևն է հաստատվել, որտեղ որ վարձակալը պարտավորվում է ներդրումների չափը նշել, ժամանակացույցը, թե որ ժամանահատվածում, ինչ աշխատանք պետք է իրականացնի և աշխատատեղերի բացման մասով:
Նախկին 137 վարձակալների մեծ մասն անտառային տարածքներն իրենց նպատակին չի ծառայեցրել և բնությանը հասցրել է էական վնաս, ասում է ոլորտի պատասխանատուն, նշում՝ եղել են նաև դեպքեր, երբ վարձակալները պատշաճ չեն վճարել վարձը, որոշ տնտեսվարողներ էլ հողի վարձակալական արժեքից տասը անգամ ցածր են վճարել: Օրինակ, Սիսիանի անտառտնտեսության նախկին ղեկավար Արկադյա Արշակյանը նույն անտառտնտեսության հողատարածքները չնչին գնով վարձակալել էր իր պաշտոնավարման ժամանակ: Դատախազությունում և հակակոռուպցիոն կոմիտեում 30 քրեական գործ կա հարուցված: Վերջին աղմկահարույց բացահայտումները կապված էին Ծաղկաձորի անտառների վարձակալների հետ, որոնց թվում էին ֆինանսների նախկին նախարար Գագիկ Խաչատրյանի կինը, գործարար Սամվել Մայրապետյանը, «Հայանտառ» ՊՈԱԿ-ի նախկին տնօրեն Միքայել Մանուկյանը, Ծաղկաձորի քաղաքապետի ազգականը, Հրազդանի անտառտնտեսության ղեկավարը և ուրիշներ:
Անտառային կոմիտեի նախագահը հիշեցնում է՝ վարձավճարում փոփոխություն չի եղել, ինչպես նախկինում, հիմա էլ այն որոշվում է կադաստրային արժեքի նվազագույն չափով: Կախված գոտիականությունից ու օգտագործման նպատակից, վճարը տարբեր է՝ 230.000-ից մինչև 1 միլիոն 200 հազար դրամ՝ 1 տարով 1 հեկտարը վարձակալելու համար: Անտառային տարածքները կարելի է վարձակալել մինչև 60 տարի, այդ հողը թույլաատրվում է օգտագործել սպորտի, մշակույթի, զբոսաշրջության զարգացման, կենդանական աշխարհի վերարտադրության և գիտահետազոտական աշխատանքների իրականացման համար:
Վլադիմիր Կիրակոսյան - Պետական սեփականություն համարվող անտառային հողերում հիմնական շինություններ չեն թույլատրվում բացառապես թեթև կոնստրուկցիայով շինություններ: Ոչ մի ծառ և թուփ չի հատվում, տվյալ տարածքը երբ վարձակալը մրցույթի կարգով, մրցույթի արդյունքում հաղթող է ճանաչվում, ցանկացած ծառ հաշվեգնահատվում է՝ տեսակը, քանակը և ֆիքսվում է պայմանագրի մեջ:
Տարածքի պահպանություն, աղբահանության իրականացումը պարտադիր պայման է: Պայմանագրերի պայմանների կատարման համար Անտառային կոմիտեում նոր վարչություն է ստեղծվել:
Հեղինակ՝ Հովհաննես Վարդանյան
