ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը Ֆեյսբուքի իր էջում տեղեկացրել է, որ պատրաստ է բանավիճել Սեյրան Օհանյանի և Արթուր Վանեցյանի հետ:
«Պետրոս Ղազարյանը ինձ և «Հայաստան» խմբակցության ղեկավար Սեյրան Օհանյանին հրավիրել է բանավեճի՝ հանրային եթերում։ Ես համաձայն եմ բանավիճել՝ բաց և հրապարակային, ուղիղ եթերով կամ ցանկացած այլ ֆորմատով։
Ավելին, ես պատրաստ եմ բանավիճել միաժամանակ՝ գեներալներ Սեյրան Օհանյանի և Արթուր Վանեցյանի հետ։
Հուսամ՝ պարոնայք գեներալները կտան իրենց համաձայնությունը և չեն խուսափի ինձ հետ հրապարակային բանավեճից՝ ի տես ամբողջ ժողովրդի»,- գրել է Կոնջորյանը։
Ավելի վաղ հաղորդավար Պետրոս Ղազարյանը Ֆեյսբուքի իր էջում Սեյրան Օհանյանին և Հայկ Կոնջորյանին հրավիրել էր Հանրային հեռուստաընկերություն՝ քննարկման։
«Իրար հեռակա ինչ ասես ասելու փոխարեն շատ ավելի պատասխանատու կլինի նստել դեմ դիմաց և քաղաքակիրթ բանավիճել։ Կուզեք ուղիղ եթեր։ Սպասում եմ արձագանքներին»,- գրել էր Ղազարյանը:
