Վրաստանի «Վրացական երազանք» իշխող կուսակցության նախագահ միլիարդատեր Բիձինա Իվանիշվիլին հայտարարել է քաղաքականությունից հեռանալու որոշման մասին՝ տեղեկացնում է INTERFAX-ը:
«Կարծում եմ, որ առաքելությունս կատարել եմ: Ես որոշում եմ կայացրել վերջապես հետ կանգնել քաղաքականությունից և հրաժարվել կառավարման ղեկից: Ես լքում եմ և՛ կուսակցության նախագահի պաշտոնը, և՛ կուսակցությունը»,- ասվում է Իվանիշվիլիի հունվարի 11-ին հրապարակված հայտարարության մեջ:
Վրացի քաղաքական գործիչը նշել է, որ այդ որոշման կայացման գործոններից մեկն իր տարիքն է: Նա շուտով կդառնա 65 տարեկան և մտադիր է վերադառնալ այն կյանքին, որը վարել է մինչև 2011 թվականին քաղաքականություն մտնելը:
Իվանիշվիլին վստահ է, որ իր հեռանալը չի թուլացնի կուսակցությունը, հակառակը՝ այն էլ ավելի կամրապնդվի, կդառնա կենսունակ ու մոտիվացված, ավելի ակտիվ կդառնա նաև Վրաստանի կառավարությունը:
