4 fevralda Ermənistan Respublikasının baş naziri Nikol Paşinyan Birləşmiş Ərəb Əmirliklərinin Əbu-Dabi şəhərində Azərbaycan Respublikasının prezidenti İlham Əliyevlə görüşüb.
Tərəflər Vaşinqtonda ABŞ Prezidenti Donald Trampın ev sahibliyi etdiyi və şahidi olduğu Sülh Zirvəsinin razılaşmalarının həyata keçirilməsində əldə edilən irəliləyişi alqışlayıblar. Onlar Ermənistan və Azərbaycan arasında münasibətlərin ikitərəfli formatda normallaşdırılması prosesinin müsbət dinamikasının qorunmasının və inkişaf etdirilməsinin vacibliyini qeyd ediblər.
Tərəflər hər iki cəmiyyətin gündəlik həyatlarında sülhün real faydalarını gördüklərini etiraf ediblər. Onlar ikitərəfli ticarətin başlamasından və Azərbaycandan Ermənistana neft məhsullarının davamlı ixracından, eləcə də üçüncü ölkələrdən Ermənistana taxıl və digər malların Azərbaycan ərazisindən keçməsi ilə tranzitindən məmnunluqlarını bildiriblər.
Tərəflər ikitərəfli ticarət və iqtisadi əməkdaşlığın genişləndirilməsi üçün imkanları araşdırmağa davam etmək barədə razılığa gəliblər.
Onlar həmçinin vətəndaş cəmiyyəti nümayəndələrinin qarşılıqlı səfərlərini alqışlayıblar və etimad quruculuğu tədbirlərinin genişləndirilməsinin zəruriliyi barədə razılığa gəliblər.
Baş nazir Paşinyan və prezident Əliyev TRIPP və digər infrastruktur layihələrinin həyata keçirilməsini müzakirə ediblər.
Ermənistanın baş naziri və Azərbaycan prezidenti iki ölkə arasında sülh və sabitliyin daha da möhkəmləndirilməsi üçün səyləri davam etdirməyə hazır olduqlarını bir daha təsdiqləyiblər və ikitərəfli münasibətlərin normallaşması prosesinə dəstək olmaq üçün əlaqələri davam etdirmək barədə razılığa gəliblər.
