Ermənistan Respublikasının ərazi idarəetmə və infrastruktur nazirinin müavini Armen Simonyan İran İslam Respublikasının neft nazirinin müavini Məhəmməd Sadiq Əzimifər və İran İslam Respublikasının Ermənistan Respublikasındakı fövqəladə və səlahiyyətli səfiri Mehdi Sobhanın başçılıq etdiyi nümayəndə heyətini qəbul edib. Bu barədə Ermənistan Respublikasının Ərazi İdarəetmə və İnfrastruktur Nazirliyi məlumat yayıb.
Armen Simonyan qonaqları salamlayaraq, Ermənistan və İran arasında qurulan səmərəli ikitərəfli əməkdaşlığının vacibliyini vurğulayıb.
Məhəmməd Sadiq Əzimifər qəbula görə təşəkkür edib və görüşün iki ölkə arasında tərəfdaşlığın dərinləşməsinə təkan verəcəyinə ümidvar olduğunu bildirib.
Görüş zamanı enerji sektoru ilə bağlı məsələlər müzakirə olunub. İranın enerji sektorunun idarəetmə modeli, yanacaq istehsalı və ixrac imkanları və perspektivləri təqdim olunub.
“İran-Ermənistan 400 kV-luq hava elektrik xəttinin və müvafiq yarımstansiyanın tikintisi” və “Elektrik enerjisi üçün qaz” proqramlarına toxunulub. Energetika və mineral sərvətlər nazirinin müavini qeyd edib ki, Ermənistan bu proqramların rəvan həyata keçirilməsinə hər zaman dəstək verib.
Görüşün sonunda tərəflər müzakirələrin davam etdirilməsi və təcrübə mübadiləsi və peşəkar bacarıqların inkişafı üçün tədbirlərin həyata keçirilməsi barədə razılığa gəliblər.
